Accessibility links

сишәмбе, 6 декабрь 2016, Казан вакыты 05:55

Törkiädä yaña xökümät tözeläçäk. Ä menä yaña prezident saylana alırmı?


Düşämbedä Törkiä premier-ministrı Räcäp Tayyıp Erdoğan, prezidenttan yaña xökümät tözü yöklämäsen aldı. Anıñ islamçı AK partiäse küptän tügel ütkän parlament saylawlarında ciñü yawlağan ide. Erdoğan xökümätne tiz arada tözer dip kötelä, ä menä ber ay eçendä ütergä tieşle prezident saylawları ildä yänä kierenkelek tudıra ala.

Şuşı yılnıñ april ayında Törkiä premier-ministr Räcäp Tayyıp Erdoğan üzeneñ tışqı eşlär ministrı Abdulla Gülne prezidentlıqqa täqdim itep, oppozitsiä häm xärbi citäkçelekneñ qatı qarşılığına tap bulğan ide.

Axır çiktä ul çigenergä häm waqıtınnan alda parlament saylawları iğlan itergä mäcbür buldı.

22 Yüldä ütkän şul saylawlarda Erdoğannıñ Ğädellek häm Täräqqiät partiäse yänä zur ciñü yawladı häm parlamentta küpçelekkä ireşte.

Uzğan comğa şuşı parlament ant kiterde. Düşämbedä prezident Äxmät Näcdät Säzär Erdoğanğa yaña xökümät tözergä quştı.

"Xökümättä 4 yıl 8 ay eşläw täcribäsennän çığıp, bez küp mäsälälärne çişerdäy tağı da köçleräk xökümät tözerbez" dide Erdoğan.

Yaña xökümät çınlap ta tiz arada tözler axrı. Ä menä ber ay eçendä saylanası prezident belän niçek bulır, Törkiä yänä uram cıyınnarına kerep çummasmı?

"Yuqtır, xäzer wazğiät küpkä tınıçraq. Berençedän, xäzer prezident saylaw öçen 2/3 kvorumı bar. Yağni bu inde kirtä bula almıy" di Ankaradağı Tepav säyäsät institutı belgeçe David Barchard.

Erdoğan bu yulı da prezidentlıqqa şul uq Abdulla Gülne alğa sörerme digän sorawğa, Barchard, xäzer ul anı ciñel ütkärä alaçaq, läkin bu nazmätkä qarşılıq bik zur, Gül prezident bulsa, bu Törkiä tarixında ber borılış bulaçaq, digän fikerdä:

"Mäsälä şunda, Gül AK partiäseneñ islamçı qanat wäkile sanala, anıñ xatını yawlıq bäyläp yöri. Bu alarnıñ yäşäw räweşe. Ägär ul häm anıñ xatını prezident sarayına ütsälär, protokol-berkätmälär tulısınça üzgärep betäçäk. Törkiä şunduq başqa urınğa äylänäçäk. Ğadi xalıq, urta sıynıf, Gülgä qarşı buluçılar monnan qurqa" di Barchard.

Zamanında Törkiägä nigez salğan Atatürk "Baş yawlığı xat-qıznıñ abruyın töşerä, millät öçen kirtä bulıp tora" digän süzlär äytkän ide.

Läkin waqıt belän Törkiä şaqtıy üzgärde. Uzğan ay saylawlardan soñ Abdulla Gül, jurnalistlar belän oçraşuında, "Gülne prezidentılqqa" digän şiğärlär qıçqırğan xalıqnı iskä aldı. Min xalıqnıñ bu ixtıyarına küz yoma almıym, dip östäde ul.

ali ğilmi
XS
SM
MD
LG