Accessibility links

җомга, 9 декабрь 2016, Казан вакыты 02:58

BMOnıñ 62-nçe Ğömüm Cıyını üz eşen başladı


Yözdän artıq ilneñ citäkçeläre ber atna buyı ikeyaqlı häm küpyaqlı diplomatik mäsälälär belän şöğellänäçäk. Cıyınnıñ başında AQŞ prezidentı çığış yasadı. Sişämbe kiç şul uq mönbärdän Iran prezidentı Mäxmüt Äxmädinicat ta süz tota.

Bü könnärdä New York dönyanıñ üzägenä äwerelde. BMOda iñ yuğarı däräcädä Ğiraq, Äfğänstan, Cirneñ cılınuı kebek mäsälälär qarala.

AQŞ prezidentı George Bush üz çığışında terrorğa qarşı köräş mäsälälärenä basım yasadı.

"Berençedän, BMOnıñ maqsatı xalıqlarnı zolımnan häm köç qullanudan qotqaru. Ğömümi keşe xoquqları deklaratsiäseneñ berençe maddäse barlıq keşelär dä irekle, tigez däräcädä häm tigez xoquqlı bulıp tua dielgän. Keşelekkä näfrät qaraşın urnaştıru maqsatında ğäyepsez keşelärne üterüçe terrorçılar häm ekstremistlar bu döreslekne kire qağa" dide Bush.

BMO general sekretare Ban Ki-Moon düşämbe könne qatı eş aldağı aylarda da däwam itär dip ötemlänüe turında äytte.

"Bu BMO tarixında küpyaqlı diplomatiäneñ iñ qızu çağı bulır dip isäplim. XXI ğasırda BMO yañadan mäsälälärne qarap çişeleşlär tabuçı dönya forumına äwerelä" dide Ban.

Sişämbe könne cıyınnı açu çığışında ul BMOnıñ eşçänlegen üzgärtergä çaqırdı.

"Bezgä BMOnıñ eçke klimatın üzgärtergä kiräk. Üz eşebez turında yañaça uylaw zarur. Töp temalar ğadiläşterü, kamilläşterü häm wäkalät birü bulırğa tieş" dide.

Ğömüm Cıyınnıñ yaña prezidentı itep saylanğan Srgan Kärim bıyıl cıyınnıñ töp teması klimat üzgäreşläre bulaçaq dide.

Düşämbe könne Ban Ki-Moon citäklägän dönyaküläm cılınu turındağı söyläşüdä 70-läp ilneñ citäkçese qatnaştı.

Dikäber ayında Indoneziäneñ Bali utrawında klimat üzgäreşlärenä bağışlanğan sammit ütäçäk. Anda törle illärneñ xökümätläre dönyaküläm cılınuğa qarşı çaralar kürü turında söyläşep kileşer dip kötelä.

Kärim Cıyında terrorğa qarşı köräş mäsälälärenä dä iğtibar zur bulaçaq dide.

"Bu utırışnıñ kön tärtibendä terrorğa qarşı çaralarğa da zur urın birelä. Bez alğı sızıqnı köçäytergä, çaralarnı, qorallarnı häm ısullarnı yaxşırtu öçen äğza illär arasında xezmättäşlekne nığıtırğa tieşbez. Şul isäptän dönyanıñ härtörle urınında terrorçılarğa häm terrorizmğa höcüm itü turında tieşle konvensiä qabul itärgä" dide Kärim.

Aldağı atnalarda Gömüm Cıyın qısalarınnan çittä dä küp kenä oçraşular kötelä. Ul oçraşularda Darfurdağı genodsid, Yaqın Könçığışta tınıçlıq urnaştıru mäsäläläre dä qaralaçaq.
XS
SM
MD
LG