Accessibility links

шимбә, 10 декабрь 2016, Казан вакыты 19:51

Kerbalada iminlek saqlaw ğiraqlılar qulına tapşırıla


Ğiraqnıñ küpçelek xalqın şığıylar täşkil itkän Kerbala wiläyätendä iminlek saqlaw eşläre düşämbe könne AQŞ xärbilärennän Ğiraq iminlek köçlärenä tapşırılır dip kötelä. Kerbala iminlek saqlaw ğiraqlılarğa tapşırılğan 18-nçe töbäk bulaçaq.

Ğiraqnıñ üzägendäge AQŞ köçläre citäkçelege Ğiraq köçläre Kerbala wiläyätendä iminlek saqlawnı tulısınça üz qullarına alırğa äzer dip belderde. General Mayor Rick Lynch düşämbe könne iminlek öçen cawaplılıqtan azat iteläçägen belderde. Şul uq waqıtta ul yardäm kiräk bulsa AQŞ köçläre äzer toraçaq dip tä östäde.

Ölkä politsiäse başlığı Raid Şakir äytüençä, 10 meñnän artıq Ğiraq xärbi bu yaña wazıyfağa kereşergä äzer tora. Başqala Bağdadtan 80 çaqrımlap könyaqtağı Kerbala çağıştırmaça tınıç töbäk sanala. Ämma andağı şığıy törkemnär arasında bäreleşlär dä bulğaladı.

Avgust ayında ölkä başqalası Kerbalada dini bäyräm waqıtında iminlek köçläre belän şığıy suğışçılar arasında bäreleşlär çığıp kimendä 50 keşe hälak buldı. Kerbalada şığıylarnıñ 2 möhim törbäse dä urnaşqan.

Elegräk iminlek saqlaw eşläre 17 töbäktä, şul isäptän Äl-Mutanna, Di Qar, Än-Nacaf, Maysan, Dahuq, Irbil häm äl-Söläymaniada Ğiraq köçlärenä tapşırıldı.

Ğinwar ayında AQŞ prezidentı George Bush Ğiraq xökümäte noyäber ayına Ğiraqnıñ barlıq töbäklärendä dä iminlek öçen cawaplılıqnı üz qulına alırğa cıyına dip äytkän ide.

Soñraq Pentagon ul könne 2008 yılnıñ mart ayına häm tağın da soñraq 2008-neñ yülenä kiçekterde. Bu köndälek höcümnär bulıp torğan töbäklärdä Ğiraq politsiäsen äzerläw qıyınlıqları, iqtisadıy häm säyäsi tärräqiätneñ aqırın baruı belän añlatıldı.

Uzğan şimbä könne Quşma Ştatlarnıñ törle şähärlärendä meñnärçä keşe Ğiraq suğışın tuqtatunı taläp itep uramnarğa çıqtı.

San Fransisko, Los Anceles, Çikago, New Orleans, New York, Boston häm başqa şähärlärdäge protest cıyınnarında qatnaşuçılar xökümätene AQŞ ğäskärlären ilgä qaytarırğa öndäde. Alar şulay uq Kongressnı salım aqçaların suğışqa tügel, ä sälamätlek saqlawğa häm mäğärifkä totarğa çaqırdı.

New York Ştatı Tınıçlıq Ğämäle dip atalğan oyışmanıñ başqarma mödire, protest çaraların oyıştıruçılarnıñ berse Cheryl Wertz "Bu AQŞ xärbiläreneñ qanunsız okkupatsiäse. Bezgä monı tuqtatırğa kiräk. Bügen cıyılğan xalıq, yañğır qoyıp toruğa qaramastan monda kilep prezidentqa, Kongressqa nıqlı itep Ğiraqtan AQŞ ğäskärlären çığarırğa kiräklegen äytergä teli" dide.
XS
SM
MD
LG