Accessibility links

шимбә, 10 декабрь 2016, Казан вакыты 17:52

Gruziä xakimiätläre qarşılıq çaraların quyıp tarattı


Gruzia xakimiätläre bügen, Tbilisida barğan protest çaraların kön dawamında berniçä tapqır quyıp tarattı. Moña qädär, Gruziädäge uram ciyınnarı 5 kön buyı tınıç bardı. Bügen Tbilisida politsiä häm protest belderüçelär arasında bäreleşlär buldı. İrtän politsiä parlament binası yanında ciyılğan keşelärne subärğeç maşinalar häm yäş gazın qullanıp, Rustavili mäydanınnan qudı. Soñınnan başqa cirdä ciyılğan xalıq ta su süpterğeçlär belän quyıp taratıldı.

Sişämbe irtän, berniçä säğät eçendä Tbilisinıñ Rustavili mäydanın çistartu çarası başqarıldı. Qarşılıq belderüçelär törkeme Gruziä parlamentı qarşında torğan. Alar berençelärdän bulıp, rezin tayaqlar belän qorallanğan politsia belän oçraşa. Politsia 100-läp keşene, şul isäptän 10-lap açlıq totuçını mäydannan qısrıqlap çığarırğa tırışa. Näticädä bäreleşlär başlana. Oppozitsiä wäkilläre qulğa alına. Qöç qullanu küreneşläre televidenie kanalları efirında kürsätelde, dip xäbär itelä.

Tbilisi şähär başlığı bügen jurnalistlar belän maxsus oçraşu uzdırıp, şähär xakimiätläre şähärneñ töp mäydanın çistartu qararın qabul itte, dip äytte. “Min protest çaralarında qatnuçılardan, Tbilisi çatırlar şähärenä äwereläçäk, dip ğorurlanıp äytkänen işettem. Bez moña yul quymadıq. Eye, bez monı kisättek, berençedän qanunnar şulay eşlärgä quşa, bu alarnıñ şähäre çatırlar, köpçäqlär, yoqlaw qapçıqları şähärenä äwerelderüen telämägän keşelärneñ qanuni teläge dä”- dide Tbilisi şähär başlığı.

İrtän protest çaralarında qatnaşuçılar quyıp taratılsa da, soñınnan oppozitisä wäkilläre yañadan mäydanğa qayta. Yözlärçä politsiä, tawış köçäytekeçlärdän uram ciyınına kilüçelärne taralırğa çaqırıp tordı. Qarşılıq belderüçelär taralmağaç, politsiä alarğa qarşı maşxsus maşinalardan su sipterde, yäş gazın qullandı. Gruziäneñ elekke tışqı eşlär ministrı, oppozitsiä citäkçeläreneñ berse Salome Zurabashvili irtän bulğan quyıp taratu ğämäle turında bolay digän ide: “Demokratiä monda bezneñ yaqta, açlıq tötüçlarğa, xatın-qızlarğa qarşı, 1meñ ğäskärine cibärep xökümät üzen kürsätte. Bu demokratiä bulsa, bez demokratiäneñ närsä ikänen yaxşıraq beläbez. Bez duslarıbıznı, Saakashvili äfändeneñ tügel, Gruziäneñ dusları bulırğa çaqırabız. Ul üzen bügen bolshevik diktator itep kürsätte.”

Oppozitisiä Tbilisinıñ başqa ber urınında, Rikida digän urında ciyıla. Anda da politsiä kilep ikençe tapqır xalıqnı sü sipterep quyıp tarattı. Gruziä Parlamentı räise Nino Burdjanadze, bügen mäğlümat çaralarında çığış yasap protest belderüçelärne tınıçlıq saqlarğa häm oylärenä taralırğa çaqırdı. Soñınnan Gruziä Prezidentı Mixail Saakaşvili televideniädä çığış yasap, härkemneñ üz fikeren belderü xoquqı bar, ämma politsiäneñ ğämälläre qanuni buldı, dide.

Gruziä sälämätlek saqlaw ministrlığı mäğlümatlarına qarağanda bügen 200dän artıq keşe meditsina yärdämen sorap kilgän bulğan.

Bikä Timerova
XS
SM
MD
LG