Accessibility links

шимбә, 10 декабрь 2016, Казан вакыты 19:45

Bötendönya tatar kongressında törle töbäklärdän cıyılğan xatın-qızlar belän oçraşu ütte


Sişämbe könne Bötendönya tatar kongressında (BTK) Rusiäneñ törle töbäklärennän cıyılğan xatın-qızlar Başqarma komitet citäkçeläre İndus Tahirov, Roza Tufetulova belän oçraşqanda, Tatarstan milli säyäsät, milli tärbiä alıp baruda tayanıçıbız bulırlıq suveren däwlät bulıp qalsın ide, digän teläk belderdelär. Tatarlar küpläp yäşi torğan törle töbäklärdän cıyılğan xatın-qızlarnıñ Qazanğa kilü säbäpläre 8 Mart bäyräme üñayınnan bulsa da, iñ berençe oçraşuda uq süz säyäsätkä kerep kitte. Kereş süzendä İndus Tahirov xatın-qızlarğa “sezgä bu süzlärne bulaçaq III kongressta ğına söylärmen äle digän idem. Läkin wäzğıät şundıy, ireksezdän sezneñ belän söyläşäse, kiñäşäse kilde” dide. Ul süzne Başqortostanda tatarlarnı başqortlaştıru säyäsätennän başladı. Annarı soñ xalıq sanın alu kampaniäsenä tuqtaldı. Anıñ fikerençä, tatarlarnı başqortlaştıru, başqa millätlärgä waqlaw ğamälläre asılında Rusiäneñ milli respublikalarnı beterü säyäsäte yata.

Oçraşuğa cıyılğan xatın-qızlar cıyılış isemennän tatar xalqına möräcäğät belän çığarğa niätlädelär. Şul uq könne töştän soñ BTK häm “Tatarstan xatın-qızları” ictimaği oyışması çaqıruı belän cıyılğan qunaqlarnı Tatarstan Däwlät Şurası räise Färit Möxämmätşin qabul itte. Ä 6 mart könne köndez alarnı bäyräm uñayınnan Tatarstan Prezidentı Mintimer Şäymiev qabul itäçäk. Alarnı törle-törle büläklär kötä inde. Qazannıñ öydä qul eşläre belän şöğellänüçelär kombinatı xezmätkärläre Qazan qunaqlarına 8 Martqa 750 Qazan sölgese äzerläp quydılar, dip xäbär itte “Tatar-İnform” agentlığı. Älege sölgelär täwge märtäbä yaña cihazlarda Sankt-Peterburgta citeşterelä torğan computer çigüe avtomatlarında çigelgän ikän.
XS
SM
MD
LG