Rusiä premyerı Mixail Kasyanov Tatarstanda buldı. Ömetlär aqlanırmı?

Rusiä xökümäte citäkçese Mixail Kasyanovnıñ Tatarstanğa kilüwe zur ömetlär uyattı. Respublika citäkçeläre bu ömetlärne däülät zakazı, budjet aqçaları, salım taşlamaları belän bäyli. Mixail Kasyanov ta aña töbälgän küzlärne kürep, Tatarstan yağı işetergä telägän süzlärne äytte. Sişämbe kiç, jurnalistlar belän bulğan oçraşuda Rusiä xökümäte citäkçese Tatarstan iqtisadı gel üseştä dip, maqtau süzlären dä äytte, wäğdälär dä birde. Qazanda bulğanda, Mixail Kas'yanov Kremldä ber cıyılış ütkärde. Rusiä premyerı anda töp iğtibarnı aviatsiä tarmağına, tögälräk äytkändä, Qazanda eşlängän oçqıçlarnı, boralaqlarnı lizingka tapşıruğa yünältkän. Ütkän yılda Rusiä iqtisadı öçen cawaplı oyışmalar, ildä aviatsiä tarmağın üsterü programmasın qabul itkän ide. Belgeçlär, şulay uq, Rusiädä eşlängän ürnäk oçqıçlar räten dä bilgelägän bulğan. Alar arasında Qazanda citeşterelgän ike maşina da bar. Rusiä premyerı äytüençä, TU-214 oçqıçın, «Ansat» boralağın lizingka tapşıru programması yaqın arada ğämälgä kertelergä tieş. Anıñ öçen, Rusiä budjetına aqçalar da salınğan. Rusiä xökümäte räise belän bergä kilgän sänäğät ministrı İlya Klebanov älege ciyılışta TU-204, Il-96 oçqıçları inde lizingka tapşırılıp, Rusiä budjetınnan aqça ala başlawı turında äytkän.