Accessibility links

шимбә, 3 декабрь 2016, Казан вакыты 03:29

Yuğarı uqu yortlarına kerü imtixannarı başlandı


Yuğarı uqu yortlarına kerü imtixannarı başlandı

Cäy könnäre küplär öçen bik qızu waqıt. Şul isäptän, abiturientlar öçen dä. Şuşı könnärdä respublikanıñ yuğarı uqu yortlarına kerü imtixannarı başlanıp kitte. Äle mäktäplärdäge çığaru imtixannarınıñ xatiräläre dä onıtılmağan, inde menä bulaçaq studentlar öçen tağın da awırraq waqıt citte. Esse, matur cäyge könnärgä dä qaramastan, alar başların da kütärmiçä uqu yortlarına kerergä äzerlänälär. Xäyer, bu çor abiturientlar öçen genä tügel, ä alarnıñ ata-anaları öçen dä bik cawaplı waqıt. Ğädättägeçä, Qazan yuğarı uqu yortlarında uqırğa kerergä teläwçelärneñ sanı bik yuğarı. Qayber fakultetlarda xättä mäktäpne medalgä tämamlawçılar arasında da konkurs barlıqqa kilgän. İñ populär belgeçleklärgä kilgändä, yıldağıça liderlar isemlegendä yurist, jurnalist, psixolog, tabiblar berençelekne cibärmi. Şuşı belgeçlärne äzerli torğan fakultetlarda konkurs ber urınğa 7-8 keşegä citä. Ä menä iñ az uqırğa teläwçe belgeçleklär isemlegendä berençelekne bıyıl fiziklar yawlağan. Qazanda şulay uq Rusiä İslam universitetına da kerü imtixannarı başlanıp kitte. Çärşämbe, 17 yül könne, bu yuğarı uqu yortında da berençe imtixan ütte. Universitetnıñ rektorı Ğosman xäzrät İsxaqi süzlärenä qarağanda, äzerlek bülegenä 70-tän artıq ğariza birelgän. Alar arasınnan 40 keşene genä saylap alaçaqlar. Qor’än häm şäriğät fakultetlarına 25-är keşe qabul iteläçäk. İslam universitetına kerergä telägän barlıq abiturientlar urta mäktäp programması nigezendä urıs tele, din ğıleme, tarix häm tuğan teldän imtixan biräçäklär. Annan soñ alar psixolog belän oçraşıp, ğomümi äñgämä ütäçäk. Ğosman xäzrät äytüençä, Kavkaz respublikaları, başqa yıraq ölkälärdän kilüçelär häm töbäklärneñ möselman cämğıätläre citäkçelärennän rekomendatsiäläre bulğan abiturientlar öçen qabul itü imtixannarınıñ ikençe ağımın ütkärü mömkinlege dä bar ikän.
XS
SM
MD
LG