Accessibility links

сишәмбе, 6 декабрь 2016, Казан вакыты 19:10

Tatar belän Başqort arasındağı “kierenkelek”


Tatar belän Başqort arasındağı “kierenkelek”

Başqortostan zıyalıları möräcäğätenä räsmi mäğlümat çaralarında prezident kiñäşçese häm soñğı waqıtta bik küp bäxäslär tudırğan “Kem sin, tatar?” digän monografiä avtorı Rafail Xäkimov cawabı da bar. Şunı äytergä kiräk, “Tatar-başqort mönäsäbätlärendäge kierenkelek” digän bu mäqälädä “kierenkelek” süze quştırnaqlar eçenä alınğan. Älege yazmadan ber özek:

Bilgele, Bötendönya tatar kongressı häm tatarlarnıñ Rusiä prezidentı V.Putin belän oçraşuı (anda M.Räximov ta qatnaştı) barısı öçen dä bäyräm buldı, tik iñ elek bu konkret mäsälälär çişelä torğan eşlekle forum ide. Çığış yasawçılar problemalar quydı, Putinğa alarnıñ qayberlären işetergä küñelle bulmadı. Ul alarğa bik tiz cawap qaytardı, yöklämälär birde. Mäsälän, federal' ministr Lesin RF prezidentı quşuı buyınça Qazanğa kilep, tatar telendä böten Rusiägä çığa ala torğan teleradiotapşırular buldıru mömkinlege turında söyläşkän ide. Böten dönyadan cıelğan tatarlarğa prezident Putinğa qarata tänqidi çığışlar yasarğa yarıy, ä Başqortstannan kilgän tatarlarğa M.Räximovnı barı tik maqtarğa ğına kiräk ideme?! Bik säer mantiq. Min xörmätle Başqortstan zıyalıları wäkillärenä Tatarstanda real' demokratiä bar häm bezdä M.Şäymievne dä tänqitlilär, dip äytäsem kilä. Küz aldığızğa kiteräsezme!? İñ gacäbe şul: prezident moña üpkälämi, ä eşen yaxşırtu öçen tieşle näticälär yasıy, bigräk tä tänqit nigezle bulsa.

Şulay itep, tatar zıyalıları soñğı waqıtta Tatarstan häm Başqortostan arasında tuğan kierenkelekne hiç tä ike xalıq arasındağı real kierenkelek dip bäyälämilär. Xaqimiät dairälärendä bälki kierenkelek çığarıp, “bolğançıq suda balıq totarğa” teläwçelär bardır. Monda öçençe yaq mänfäğätlären dä kürüçelär bar. Däwlät Şurasınıñ çärşämbe utırışında qatnaşqan Rusiä Däwlät Duması deputatı Fändäs Safiullin “Efir” televideniesenä birgän intervyusında monıñ xaqında ap-açıq itep Rusiädä respublikalarnı beterü teläge bar, ike zur respublikanı, alarnıñ xalıqların ızğıştırmıyça hiç tä beterep bulmas ide, digän fiker äytte.
XS
SM
MD
LG