Respublikada millätara mönäsäbät ni xäldä?..

Niqadär genä tatar millätçelegenä ğäyepläwlär bulsa da, tatarlar barı tik respublikada yäşäwçe başqa millätlär belän bertigezlek xoquq taläpläre, tolerantlıq qısalarınnan çıqmadılar. Uzğan cäydä Rusiä prezidentı Vladimir Putin III Bötendönya tatar kongressı delegatları belän oçraşqanda, Başqortostanda yäşäwçe tatarlar probleması quyılğaç, “A каково русским в Татарстане?” digän sorawınnan soñ zalda urnaşqan şomlı tınlıq, pauza küplärneñ isendä qalğandır. Şöker, respublikada törle millätlär - tatarlar da, başqortlar da, ruslar da üzlärenä mondıy soraw quymıylar. Läkin soñğı waqıtta Tatarstanda qayber millätlär räxät yäşämi digän uydırmalar çığarıp, respublikanıñ abruyın töşerergä mataşular yışaydı.