Accessibility links

пәнҗешәмбе, 8 декабрь 2016, Казан вакыты 01:16

Ğiraq suğışı: soñğı tärräqiät-Säddämneñ kiñäşçese Ämir Äl-Saadi Amerikan ğaskärlärenä birelde


Bügen Quşma Ştatlarınıñ qulğa alınırğa tieşle Ğiraq räsmiläre isemlegendä bulğan Säddäm Hösiänneñ yaqın kiñäşçese Ämir Hamudi al-Saadi amerikan ğaskärlärenä birelde. Äl-Saadineñ birelüen Germaniäneñ ZDF televideniäse töşergän dip böten könbatış mäğlümat agentlıqları xäbär itte. Üzeneñ Bağdadqa höcümnär başlanğaç ta öyennän kitmägänen beldergän Al-Saadi, birelüeneñ säbäben-üzen ğayeple sanamağanı belän bäyläde. Tıñlawçılarıbıznıñ xäterendä bulsa, suğışqa qadär Säddäm kiñäşçese Ämir Al-Saadi Berläşkän Millätlär Oyışmasınıñ qoral inspektorları belän xezmättäşlek itep alar belän bergä matbuğat oçraşularında qatnaşqan ide. Ul çaqta da Al-Saadi, Ğiraqnıñ küpläp üterü qoralına iä bulmağanın, ber ni qaçırırğa tırışmağanın äytep kilde, menä anıñ fevralneñ 9da yasağan çığışınnan ber özek. Bez, 1445 sanlı İminlek Şurası rezolyutsiäse qabul itelgännän birle härwaqıt döreslekne söyläp kildek –häm bezneñ eşlärebez çista, şul uq waqıtta başqa yaqnıqı-alay tügel, digän ide Säddäm kiñäşçese. Bügen Amerikan ğaskärlärenä birelgändä dä Al-Saadi, Ğiraqta küpläp üterü qoralı yuq, dide, şulay uq, Säddäm Hösiänneñ dä qayda buluın belmägänen äytte. Säddäm kiñäşçese Quşma Ştatların Ğiraqqa ber säbäpsezdän höcüm itüe öçen ğayepläde. Bügen dä, Al-Saadi, ZDF kanalına, min härçaq döreslekne söyläp kildem, dide. Min böten soñğı programmalar turında beläm. Kollegalar belän bergä eşlädek. Bezneñ eşkä ber keşe dä tıqşınmadı, ber keşe dä närsä söylisen äytep tormadı, dide Al-Saadi. Al-Saadi üzeneñ birelüen Germaniäneñ ZDF kanalı xäbärçeläreneñ töşerep toruın sorağan häm soñınnan ul Germaniä televideniäseneñ sorawlarına cawap birde. Şulay uq mäğlümat agentlıqları, Al-Saadineñ xatını-alman, digän xäbärne tarattı. Ğiraq şähärlärendä tärtipsezleklär, urlaw häm talawlar kontroldän çığıp kitkäç Amerikan ğaskärläre Ğiraq politsiäsenä yardäm sorap möräcäğät itte. Tärtip saqlaw eşenä monnan soñ 400 Ğiraq politsiäse ofitserı quşılaçaq. Bügen Amerikan xärbi wäkilläre belän oçraşqaç bu xaqta Ğiraq politsiäse polkovnigı Mohammäd Zaki belderde. Yevropa buylap bügen Ğiraq suğışına qarşı çaralar uzdı, suğışta häläk bulğannarnıñ istälegenä bağışlanğan mätäm cıyınnarı oyıştırıldı. Germaniäneñ Berlin şähärendä 10 meñ, könbatışqa taba, Hamburgta 250, häm könyaqtağı Ştudgard şähärendä 20gä yaqın keşe cıyılğan. Londonda 20 meñnän artıq keşe uramnarğa çığıp häläk bulğannarnı iskä aldı. Şundıy uq cıyınnar İtaliä häm Fransiä başqalalarında uzdı.
XS
SM
MD
LG