Accessibility links

чәршәмбе, 7 декабрь 2016, Казан вакыты 00:56

Aq yort prezident Bushnıñ Ğiraq suğışın aqlaw maqsatında yalğış mäğlümat qullanuwın tanıdı


Aq yort berençe märtäbä, Ğiraq suğışı aldınnan anıñ kiräklegen aqlaw maqsatında üzeneñ uydırma mäğlümat qullanuwın tanıdı, xörmätle tıñlawçılar. Ayırım alğanda şundıy mäğlümat ğinwar ayında prezident Bushnıñ Kongress qarşında yasağan yıllıq yullamasında faydalanğan dip xäbär itelä. Şulay itep Waşingtonda xäzer amerikan citäkçelegeneñ dä Ğiraq mäs''äläsendä şikle alımnar qullanuwı tiräsendä ğawğa qubarğa tora.

Bu ğawğa prezident Bushnıñ älegä qaqşamas toyılğan xakimiaten ni däräcädä tetränderer, bu ölkädä farazlar qılıp bulmıy, ä menä Atlantiknıñ ikençe yağında, anıñ iñ yaqın berektäşe britan premyer-ministrı Tony Blair näq şundıy uq ğäyepläwlär arqasında ilneñ parlamentında şaqtıy awır könnär kiçerä. Xäzer inde ul üze genä bulmayaçaq, Quşma Ştatlarda da andağı demokratlar, Aq yortnıñ Ğiraq mäs''äläsendä mäğlümatnı niçek kiräk şulay qullanuwın tikşerergä çaqıra, häm bu respublikan prezidentı öçen aldağı aylarda iñ awır problemalarnıñ bersenä äylänä ala. Ğinwar ayında, Kongress qarşında yasağan yıllıq yullamasında prezident Bush, maxsus xezmätlär açıqlağan yäşeren mäğlümatqa tayanıp, Ğiraq üzendä atom qoralı buldıru maqsatında şikle materiallar alırğa mataşa dip beldergän ide.

Audio, George Bush

"Britan xökümäte, Saddam Xösäyenneñ küptän tügel genä Afrikadan şaqtıy külämdä uran ezläwen açıqladı" digän ide prezident Bush yıllıq yullamasında. Läkin sişämbedä Quşma Ştatlarnıñ Däwlät İminlege Şurası wäkile Michael Anton, şuşı süzlären äytkändä prezident monı raslağan dälillärneñ bik şikle buluwın äle belmi ide dip belderde. Xäzer räsmi säfär belän Könyaq Afrikada yörgän Bush üze, aña şuşı qarşılıq turında maxsus soraw birelgäç, turı cawaptan totılıp qaldı häm Saddamnı bärep töşerü qararın yaqlıy başladı.

Audio, George Bush

"Saddam Xösäyenneñ bar dönyadağı tınıçlıqqa qurqınıç tudıruwına min şiklänmim häm Quşma Ştatlarnıñ berektäşläre wä dusları belän anı xakimiattän alıp taşlap döres eş eşläwenä dä min hiç şiklänmim" dip belderä amerikan prezidentı. Şulay itep ul turı cawaptan qaça häm şikle mäğlümatkä nigezlänep qabul itelgän şul qararın ğına yaqlarğa mäcbür qala. Aq yortnıñ xäzer Ğiraq omtılışları mäs''äläsendä xata cibärüwen tanuwı, oppozitsiädäge demokratlarnıñ älege mäs''äläne tulısınça tikşerü taläbe belän çığuwına kiterde. Senattağı demokratlar citäkçese Tom Daschle bu uñaydan bolay dip belderde.

Audio, Tom Daschle

"Monı tanu bik möhim, bu bezgä yalğış mäğlümat birelgänne tanu bulıp tora häm minemçä, älege wäzğiat tiräsendäge faktlarnı tulısınça tikşerü öçen bu yaxşı ber säbäp" di senattağı oppozitsiä citäkçese. Andağı respublikannar isä, niçek kenä bulmasın, Saddamnı bärep töşerü ğomumän alğanda uñay ber küreneş buldı digän fikerne alğa sörä. Quşma Ştatlar Kongressınıñ ike palatası da bügenge köndä näq menä respublikannar tarafınnan kontrol itelä. Wäkillär palatasındağı respublikan citäkçese Tom DeLay, prezidentnıñ üz säyäsäten aqlaw maqsatında şikle mäğlümat qullanuwı turında süzlär çıqqaç, Quşma Ştatlarnıñ Ğiraqqa qarşı suğış başlawı ber şuşı "xata" belän genä aqlanmadı, Waşingtonnıñ moña äxlaqi yaqtan nigezlängän häm töple säbäpläre bar ide dip belderde. Yäğni respublikan citäkçelege bu oçraqta üz prezidentın yaqlaw öçen mäğlüm "ciñüçegä xökem yuq" digän äytemne qullana.

Kärim Kamal, Praga.
XS
SM
MD
LG