Accessibility links

җомга, 9 декабрь 2016, Казан вакыты 16:52

Rusiä premier-ministrı, xosusıylaştıru näticäläre kire qaralmayaçaq, dip belderde


Rusiäneñ iñ ere şirkätläreneñ berse, Yukos kompaniäse tiräsendäge xällär Rusiädä eşlägän eşquarlar, investorlarnı borçuğa saldı, xakimiät xosusıylaştıru näticälären kire qararğa cıyınmıy mikän digän şiklär uyattı. Atnakiç könne xökümät citäkçese Mixail Kasyanov, xosusıylaştıru näticäläre kire qaralmayaçaq, digän belderü yasadı. Premiernıñ şuşı süzläre Rusiä eşquarların tınıçlandıra alamı?..

Atnakiç könne Rusiä xökümäteneñ xosusıylaştıru mäsäläsenä bağışlanğan maxsus utırışında, premier-ministr Mixail Kasyanov, 90-nçı yıllarda ütkärelgän xosusıylaştıru waqıtında xatalar buluın tanısa da, anıñ näticäläre kire qaralmayaçaq, digän belderü yasadı. Premiernıñ bu belderüe, älbättä, Rusiädä eşlägän eşquarlar, investorlarnı beraz tınıçlandıru maqsatı belän yasaldı.

Soñğı atnalarda general prokuratura ciñ sızğanıp eşkä kereşte, berniçä ere kompaniä, şul isäptän, Yukos şirkätendä tikşerü eşläre alıp bara. Ğäyepläwlär, nigezdä, näq menä xosusıylaştıru belän bäyle. Äytik, Yukosnıñ baş aksionerı, Menatep isemle finans törkem citäkçese Platon Lebedev 1994-nçe yılda xosusıylaştıru waqıtında xärämäläşüdä ğäyeplänä.

Prokuraturanıñ şuşı eşçänlege Rusiäneñ qimmätle qäğäz bazarına kiterep suqtı. Yukos, Sibneft, Gazprom kebek şirkätlärneñ aksiäläre 10 protsentqa qädär töşte. Rusiäneñ Sänägätçelär häm eşquarlar Berlege prezidentı Arkadi Volski süzlärençä, Yukos tiräsendäge xällär arqasında Rusiä bazarı 20 milliard dollar yuğalqan, çit il investrorları ildän kitü yağın qarıy.

Yukos başlığı, Rusiäneñ iñ bay keşese, 40 yäşlek Mixail Xodorkovski, kompaniä tiräsendäge xällärne çip-çista säyäsät dip atadı. Anıñ süzlärendä küpmeder xaqlıq bar sıman. Älbättä, prokuraturanıñ tikşerülär alıp barırğa xoquqı bar. Läkin, ni öçen ul anı näq menä xäzer başlandı, digän soraw tua.

Küptän tügel Yukos kompaniäse Rusiäneñ Sibneft şirkäte belän berläşü niäten belderde. Alış-bireş barıp çıqsa bu ilneñ berençe, ä dönyanıñ 5-nçe neft kompaniäse bulaçaq. Bu ber. İkençedän, yaqınlaşıp kilgän saylawlar aldınnan, Xodorkovski, Rusiäneñ uñ häm sul taraflı berniçä partiäsenä yärdäm wäğdä itte. Prezident taraflı urtadan baruçı Berdäm Rusiä partiäseneñ çiksez mömkinleklären iskä alğanda, Xodorkovskinıñ bu adımı Rusiäneñ säyäsi säxnäsendä küpmeder tigezlek tä''min iter ide. Küräseñ, mondıy täräqqiät Kreml daiärälärenä oşap betmägän. Küzätüçelär täqdim itkän tağın ber añlatma: Putin tiräsenä tuplanğan 2 qapma-qarşı törkem, yaña kilgän "qüätçelär" häm Yeltsin çorınnan qalğan "ğailä" keşeläre arasında barğan köräş. Berençeläre 90-nçı yıllarda däwlät bäleşen büleşüdä qatnaşa almağan, şul säbäple xäzer üç alırğa tırışa.

Niçek kenä bulmasın, şuşı wazğiät Rusiägä faydağa tügel. Belgeçlär äytüençä, fond bazarında töşenkelek, kimendä, avgust urtasına qädär däwäm itäçäk. Kasyanovnıñ wägdäse dä eşquarlarnı ällä ni tınıçlandırmas sıman. Citmäsä, şul uq könne Milek ministrlığı wäkile Aleksandr Braverman, xosusıylaştıru näticälären kire qaralmas, läkin qayber alış-bireşlär tikşereläçäk, digän süzlär äytep, şom östäde. Şulay itep, bazar Kasyanovqa tügel, ä kübräk prokuraturağa ışanır sıman. Tanılğan säyäsät belgeçe Gerorgi Satarov süzläre belän äytkändä, Kasyanov bit ul süzlär söyli, ä prokuratura - eşlär maytara.

Ali Gilmi, Praga
XS
SM
MD
LG