Accessibility links

җомга, 9 декабрь 2016, Казан вакыты 03:12

Paul Bremer Waşingtonda Ğiraq kiläçäge turında kiñäşläşülär ütkärä


Inde xäbär itelgänçä, Ğiraqnıñ waqıtlı xakime Paul Bremer bu atna azağında Bagdadtan kire Waşingtonğa qayttı. Şimbägä qarşı töndä ul Aq yortta Quşma Ştatlar prezidentı George Bush belän oçraşıp, Ğiraqta soñğı könnärdä tuğan tirän säyäsi krizisnı çişü yulların tikşerde.

Tıñlawçılarıbız inde xäbärdar, Ğiraq xalqınıñ yaqınça 60 protsentın täşkil itkän şığıylar, amerikannar ildäge xakimiatne aldan iğlan itelgänçä şuşı cäydä, ğomumi saylawlar aşa bilgelängän xökümätkä tapşırunı yaqlıy. Amerikan yağı äzerlägän häm Waqıtlı idarä şurası tarafınnan da xuplanğan plan isä xakimiatne, törle säyäsi, milli, dini törkem wäkillärennän torğan maxsus mäcleskä, döresräge şul mäcles qoraçaq xökümätkä birüne küz aldında tota. Bu xaqta uzğan noyäbrneñ 15-endä Bagdadta maxsus kileşügä ireşelgän ide häm Paul Bremer kiläçäktä şunıñ nigezendä eş itärgä cıyına. Kileşüdä maynıñ 1-enä qädär şul küçeş çorı mäclesen qoru qaralğan, şunnan soñ ul waqıtlı xökümät bilgeli häm amerikannar Ğiraqtağı xakimiatne 1-nçe yülgä näq menä şul xökümätkä tapşırırğa tieş bulaçaq. Ğomumi saylawlarnı isä Ğiraqta kiläse yılda ütkärü qaralğan. Küçeş çorı mäclese, anı waqıtlı parlament ta dip atap bulır ide, älegä ilneñ 18 wilayätennän maxsus wäkillär cibärü aşa tözeläçäk. Prezident Bush belän oçraşqannan soñ Bremer, monıñ niçek itep ğämälgä quyılaçağına qarağan mäs''älälärne qarşı yaq, bu oçraqta şığıylar belän tikşerergä äzer buluın äytte, häm xätta Waşington ber genä mömkinlekne dä kire qaqmıy dip östäde. Şulay itep ul şığıy citäkçese baş ayatolla äl-Sistanigä, amerikannarnıñ fiker qarşılıqların beterü mäs''äläsendä söyläşülärgä äzer toruına işarä itte.

Audio, Paul Bremer

"Bolar, yäğni saylawlar ütkärüme, yä inde wäkillär bilgeläwnı saqlap qalumı, älbättä, qaralırğa tieş mäs''älälär, di Bremer häm üzeneñ monı düşämbedä Berläşkän Millätlär general'' sekretare Kofi Annan belän tikşeräçägen äytä. Läkin ul berük waqıtta, üzeneñ şığıylar qaraşı belän kileşmäwe, häm Annannıñ da şundıyraq fikerdä toruı xaqında belderä.

Audio, Paul Bremer

"Bezdä, general'' sekretardağı tösle ük, saylawlarnıñ xakimiatne Ğiraq xalqına qaytaruğa qädär ütkärü mäs''äläsendä şiklär bar" di Paul Bremer. Düşämbe söyläşülärennnän soñ şul şiklär tağın da nığıy töşärme, ällä inde yaqlar berär urtalıq fikerenä kilerme, monısın kötäse genä qala. Ä älegä Bremer Berläşkän Millätlärneñ Ğiraqqa mömkin qädär tizräk qaytuın, häm anıñ üze alğa sörgän plannı ğämälgä quyuğa, yäğni waqıtlı mäcleskä wäkillär bilgeläw eşenä quşıluın teli.

Kärim Kamal, Praga
XS
SM
MD
LG