Accessibility links

сишәмбе, 6 декабрь 2016, Казан вакыты 03:50

Fallucada yañadan qorallı bäreleşlärneñ qabınıp kitüe qotılğısız kebek


Ğıraq şähäre Fallujahnı qamauğa alğan amerikan dingez pexotası andağı başkütäräçelärne qoralların taşlarğa çaqırğannan soñ häcümgä äzerleklären köçäytä. Ğıraqtağı dingez pexotasasınıñ komandirı general-leytinant James Conway baş kütärüçelärne auır qoralların tapşıru yaki yaña höcümgä duçar bulu öçen atnalar tügel, ä könnär genä qaldı dip kisätte.

General Conwey älegäçä tapşırılğan qorallarnıñ sanı häm sıyfatı qänäğätlänerlek tügel dip belderüe belän atışlarnı tuqtatu kileşüeneñ yuqqa çığacağın işarä itte. Ul cirle citäkçelärne törle millät, Süriäle, yemen , ğıraq militantları häm Saddamnıñ respublikan gvardiäse köräşçelärennän torğan 2000 tiräsendä dip xisaplanğan başkütärüçelärne qoralların tapşıruları öçen ügetlärgä çaqırdı. Ğıraqtağı koalitsiä köçläre komandirınıñ urınbasarı AQŞ brigada generalı Mark Kimmit Fallujahdağı cirle citäkçelär , baş kütärüçelärne kontrol itärgä sälätle bulğan xäldä genä problemmanı tınıç yullar belän xäl qılıp bulır dip kiçä belderde.

Audio

"Koalitsiä qan qoymau, yaña bäreleşlärne buldırmau öçen Fallujahdağı vazğiätkä tınıç yullar belän xäl çarası tabarğa teli. Cirle citäkçelär yulbaşçılıq kürsätep, şähärne räxen itep totqan keşelärgä, monnan yaxşıraq täqdim alu mömkin bulmas dip künderä alsalar, monı buldırmıy qalu mömkin bulır. "

Ber ük vaqıtta Fallujah tiräsendäge dingez pexotasınıñ sanın 3 500gä citkerü öçen anda östämä köçlär cibärelä . Alar çähär bistälärenä höcümnär dä oyıştırıp, başkütärüçelärgä yardämne yuqqa çığarırğa tırışalar. Conwey häm AQŞ komandirların şähärne köç belän qulğa eläkterüneñ politik yaqtan qimmätkä töşü ixtimallığı borçıy. Ğıraqtağı möselman ruxaniläre Fallujah yaki Najaf şähärenä häcüm itkän xäldä, AQŞ yuğarı bäyä tüliäçäk dip kisättelär. Başkütärgän şiğıy ruxanisı Al Sadr AQŞ köçläre Najafqa höcüm itkän xäldä, intexarçılarnı alarğa qarş cibärü belän kisäte.

Audio

"Küpkenä möminnär, ir-atlar häm xatın-qızlar intexarçı bulu öçen röxsät sorap miña kilälär. Min alarğa äle kötegez dip äytäm."

Şuşı ay başlarında amerikannarnıñ Fallujahğa höcüme böten Ğıraqta tiskäre täsir yasadı. Cirle tabiplar ul vaqıtta 600 ğıraqlı üterelde dip belderälär. AQŞnıñ höcüme Amerikan iminlek saqlau şirkäteneñ 4 xezmätkäre üterelgännän soñ buldı. Läkin, Conwey kiçä yasağan çığışında ike vaqiğä arasında bäyläneşneñ buluın kire qaqtı.

Audio

"Qayberävlär Fallujah operatsiäsen üç alu dip bäyälilär. Şunı äytäsem kilä. 4 amerikanlı ütereler aldınan uq dingz pexotası Fallujahda toruın kürsätä başlağan ide inde."

Conwey vaqıtlı kileşü köçtän çıqqan xäldä, Fallujadağı tınıç xalıqnıñ annan kitüen buldırırğa tırışaçağın häm şunan soñ qatı höcüm belän şähärne qulına eläkterergä tırışaçağın işarä itte. Fallujah uzğan ber yılda sönnilärneñ qarşılıq kürsätü üzägenä äylände. AQŞ administratorı Bremerneñ Saddam armiäsen taratuı häm meñlägän dävlät xezmätkären eştän quuı, qänäğätsezlekne üsterde. 400 meñ ğıraqlı eşsez qaldı. Bu adım Saddamnıñ Baath Partiäsenneñ täsiren yuqqa çığaru öçen eşlände. Xäzer isä Washington bu politikasın üzgärtep, qayber ofitser häm ölkän xezmätkärlärne yañadan eşkä alırğa ciına. AQŞ administratorı Bremer bügen yasağan çığışında bu tıyu yomışartıla, cinayättä qatnaşmağan Baath partiäseneñ elekke ağzaları yañadan eşkä alınaçaq dip belderde.

Färit İdelle, Praga.
XS
SM
MD
LG