Accessibility links

якшәмбе, 11 декабрь 2016, Казан вакыты 13:05

Ğiraq üzendä kürşe däwlätlärdän ğäskärlär urnaştırunı telämi


Ğiraqnıñ yaña xakimiatenä qarşı köräşüçe ğısyançılar ilne torğızu öçen möhim bulğan neft industriäsenä höcümnären däwam itä, äle genä Ğiraqnıñ tönyaqtağı häm könyaqtağı neft qırların totaştırğan torbaütkärgeç şartlatıldı. Şulay itep, xökümätneñ il iqtisadın torğızu omtılışlarına yänä zur orım salındı. Ämma ul berük waqıtta Ğiraqnıñ xalıqara bäyläneşlären yañartu eşen dä alıp bara. Bagdadtağı xäbärçebez bu uñaydan Ğiraq tışqı eşlär ministrı urınbasarı Xämid äl-Bäyäti belän söyläşkän ide.

Ğiraqtağı yaña xökümätneñ üz wazifaların üti başlawına äle atna ğına tulıp kilä, läkin şuña da qaramastan, üzeneñ xalıqara bäyläneşlären yañartuğa ul şunda uq kereşte diärgä bula. Östenlek aralarnı, berençe çiratta, kürşe däwlätlär belän yaxşırtuğa birelä, älbättä, tik bu eş alay ciñel genä barmas kebek. Bagdad xökümäte, misal öçen, Törkiä häm İordaniäneñ Ğiraqqa üz ğäskärlären cibärü täqdimen inde kire qaqtı. Düşämbedä "äl-Ğäräbiä" telekanalına premyer-ministr İyäd Ğäläwi, Ğiraq monı üzendäge dini wä milli üzençäleklär säbäple eşläde dip añlattı. Anıñ süzlärenä qarağanda, tirä-yündäge däwlätlär Ğiraqqa başqaça, yäğni üz çiklären nığıtıp häm alarnı törle çit il ğısyançıları ütep kerüe öçen yabıp yardäm itä ala. İlneñ tışqı eşlär ministrı urınbasarı Xämid äl-Bäyäti, Bagdadtağı xäbärçebez belän söyläşkändä, Ğiraqqa ğäräp illäre ğäskärlären cibärü mäs''äläsenä kiñräk tuqtalıp kitte.

Audio, Xämid äl-Bäyäti

"Bezgä yardämne Bäxräyn, Yämän, İordaniä, Marocco täqdim itä, läkin ğäskärlär cibärügä kilgändä, bez alarnıñ kürşe däwlätlärdän kilüenä beraz şik belän qarıybız. Berük waqıtta bez, äzerläwdä, cihazlar belän tä''min itüdä, xätta terrorçılar wä cinayätçelär xaqında mäğlümat almaşuda härtörle yardämne xuplap qarşı alır idek" di Ğiraqnıñ tışqı eşlär ministrı urınbasarı. Ul telgä alğan illärdän Ğiraq belän barı tik İordaniä genä çiktäş. Äl-Bäyäti fikerençä, Ğiraqta iordan ğäskärlären urnaştırğan oçraqta, başqa kürşe illärneñ, misal öçen Söğüd Ğäräbstanı, Süriä, yäisä İrannıñ da näq şundıy täqdimennän baş tartu qıyın bulaçaq. Näq menä şul isemlektäge qayber illärne Bagdad üzendäge islamçılarnı yaqlawda ğäyeplägän ide. Däwlät isemnäre atalmasa da, küzätüçelär, Ğiraq xökümäte küz aldında berençe çiratta Tähran wä Damasknı tota dip isäpli. Şuña kürä dä ul, ildä İrannan yäisä Süriädän ğäskärlär urnaştırunı telämi. Älege waqıtta Bagdad Süriä, İran häm İoradniä belän çik saqlawnı nığıtu mäs''äläsendä söyläşülär alıp bara. Üzendä başqa ğäräp illäre ğäskärlären qabul itügä Ğiraq küpkä uñayraq qarıy. Läkin monıñ detal''läre älegä bilgele tügel. Yämän, misal öçen, andıy telägen beldersä dä, alarnı barı tik citäkçelek Berläşkän Millätlär qulında bulğan oçraqta ğına cibäräçägen äytä. Äl-Bäyäti süzlärenä qarağanda, Quşma Ştatlarnıñ Ğiraqnı basıp aluı häm alarnıñ haman da anda qaluı bar töbäkne nıq borçuğa salğan.

Audio, äl-Bäyäti

"Bügen Ğiraq, irtägä Süriä, annarı İran dip söyläp, amerikannar bar töbäkne poşamanğa saldı, di Ğiraqnıñ tışqı eşlär ministrı urınbasarı, häm, bez alarğa, yäğni Quşma Ştatlarğa, inde küptän şunı äytkän idek, alar Saddamnıñ berdänber, üzençälekle oçraq buluın, häm anıñ xäl itelüe dä unikal'' buluın qabatlap torırğa tieş" dip belderä. Üz äñgämäsendä Xämid äl-Bäyäti, Ğiraq xökümäteneñ älegä İzrail belän diplomatik mönäsäbätlär urnaştırırğa cıyınmawın, ilneñ bu mäs''älädä Ğäräp illäre Ligası belän bergä eş itäçägen xäbär itte.

Kärim Kamal
XS
SM
MD
LG