Accessibility links

сишәмбе, 6 декабрь 2016, Казан вакыты 13:14

AQŞ köçläre Fällücäne yawlarğa torğanda, Sämärrädäge şartlawlar distälärçä keşene üterde


Şimbägä qarşı töndä AQŞ xärbi hawa köçläre häm artilleriäse Ğiraqnıñ Fällücä şähären qatı bomba utına tottı. Fällücädä yäşäwçelär soñğı aylarda mondıy köçle bombalawnıñ bulğanı yuq ide di. Şimbä irtäsendä xalıq şähärneñ ni däräcädä cimerelüen qararğa çıqtı. Cimerelgän binalar arasında ber buş xastaxanä dä bar ide dielä. Fällücädä yäşäyçe ber ğiraqlı bolay dip belderde:

AUDİO: Täräwix namazınnan soñ Amerikan köçläre bu binağa ike raketa attı. Bu bina Fällücä xalqına yardäm itü öçen Söğüd Ğärabstanı bulışlığı belän tözelgän xastaxanä ide. İordaniäle suğışçı Äbü Musab äz-Zärqäwi mondamı? Monda bernindi suğışçı da yuq. Min Ğiraq xökümätennän sorıym: Sezneñ ullarığız qayda? Ägär sez bu ilneñ xökümäte ikän, bolay eşlämägez.

Ğiraq xökümäte Fällücä xalqınıñ bu şähärdä nigezlängän dip sanaluçı suğışçılarnı, şul isäptän iordaniäle Äbü Musab äz-Zärqäwine xökümätkä tapşıruın taläp itä. Fällücä citäkçeläre isä äz-Zärqäwi bezneñ şähärdä tügel di. Zärqäwi berniçä höcüm häm üterülär öçen ğäyeplänä. Ğiraqnıñ küçeş çorı premyer ministrı Ayät Alläwi tınıç çişeleş öçen birelgän waqıt betep kilä dip kisätä. Fällücä tiräsendä AQŞ köçläre höcüm başlarğa äzer tora. 300 meñ keşe yäşägän bu şähärdän inde küplär kitkän dip sanala. Comğa könne BMO general'' sekretare Kofin Annannıñ AQŞqa häm Ğiraqqa kisätü xaqları cibärüe mäğlüm buldı. Anda ul Fällücägä höcüm başlaw Ğiraqta ğinwar ayında bilgelängän saylawlarğa zıyan kiteräçäk di. Waşingtonda AQŞ däwlät departamentı süzçese Richard Boucher Annan belän fiker ayırmalıqları buluın äytep, ul xatnı alğannan soñ Däwlät sekretare Colin Powell Annan belän söyläşte inde dide.

AUDİO: Annan Fällücädäge wäzğiät häm Ğiraqta totrıqlılıqnı, iminlekne torğızu maqsatındağı ğämälläre turında üz borçıluların citkerde. Açıqça äytkändä, bu turıda bez başqaça uylıybız.

AQŞ köçläre Fällücägä höcüm başlarğa torğanda, Sämärrä şähärendä ğisyançılar berniçä urında maşinağa quyılğan bomba şartlattı. Maşinada ber intixarçı bombanı politsiä stansiäsendä şartlattı, tağın 3 bomba şähärneñ başqa urınnarında şartladı. Politsiä äytüençä 33 keşe, şul isäptän 19 politsiä xezmätkäre hälak bulğan, distälärçä keşe yaralanğan. AQŞ häm Ğiraq köçläre ğisyançılarnı quıp çığaru öçen ber ay elek Sämmärrägä höcüm itkän ide. Bügenge şartlawlar şähärdä tınıçlıqnıñ äle tiz genä urnaşmayaçağın kürsätä.

Naif Aqmal, Praga.
XS
SM
MD
LG