Accessibility links

җомга, 9 декабрь 2016, Казан вакыты 14:44

Fälästin wäkilçelegeneñ Parijğa säfäre: Arafat isän, läkin ülem tüşägendä yata


Fälästinneñ ölkän räsmiläre märtkä kitkän Arafatnı kürü yaki anıñ sälämätlege turında tabiplardan berençe qul informatsiä alu maqsäte belän Parijğa kildelär. Väkilçelek Fransiäneñ tışqı eşlär ministere Mişel Barnierı häm prezident Şiraq belän oçraştı. Läkin, Arafatnıñ sälämätlege tağı da küberäk naçarlandı digän xäbär bu vizitqa külägä töşerde.

Fälästinneñ ölkän räsmiläre belän Yasir Arafatnıñ xatını Suha arasındağı bäxäs diqqätne ayruça üzenä cälep itte. Suhanıñ fälästin citäkçelären iren tere köyençä kümärgä tırışuda ğäyepläve, başta vizitnıñ kiçekterelüenä kitersä dä, berniçä säğättän soñ Fälästinnärneñ ölkän räsmiläre , premier Ahmed Qureya, Fälästin Azatlıq Oyışmasınıñ räise vazıyfasın ütävçe Maxmud Abbas häm tışqı eşlär ministere Nabil Şaatnıñ Amman aşa Parijğa yul tottılar. Alarğa Fälästin Parlamentınıñ süzçese Rawhi Fattuh quşıldı. Ul Ramalahda Arafat turında berençe qul infromatsiä alır öçen Parijğa baru qararı turında bolarnı äytte.

Audio

"Arafatnıñ Fatax oyışması ÜKınıñ qararın xökümät ber tauıştan rasladı. Şuşı qararğa esasän, premier, PLOnıñ räise vazıyfasın ütävçese häm min Parijğa barıp, prezident Arafatnıñ sälämätlege turında mäğlümät alaçaqbız."

Suhanıñ mondıy kisken belderü belän çığuına närsä säbäp bulıp tora soñ? Suha soñğı öç yılda Parijda yäşäde. Bu vaqıt eçendä isä ire İzrael armiäse tarafınan qamauda , yäşägän öyendä totqın kebek totıldı. Suhanıñ xäzer informatsiä monopolen qulında totarğa tırışuı, Arafat yanına keşelärne kertmäve, Arafat kontrolendäge baylıq belän bäylängän digän tänqitlärgä säbäp buldı. Arafat kontrolendäge baylıq ber miliard dolar tiräsendä dip xisaplana. Bu aqçanıñ zur öleşe Fälästin Aftonomiä idaräse qaznasınnan kilgän bulırğa tieş. Xalıqara Valyuta Fondı mäğlümätlärenä kürä, 1995-nçe 2000-nçe yıllar arasında iñ kimendä 897 milion dollar yuğalğan. Fransiä politsiäse Suha Arafatqa qarşı tikşerenü eşläre alıp bara. Anıñ Fransiädäge häm Şvetsariädäge banka xisaplarında 11 yarım milion dolar tabılğan. Ramallahdan här ay sayın yäşäv öçen aña 100 meñ dolar cibärelä ikän. Annan başqa Arafatnıñ borınğı köräştäşläre anıñ 1990-nçe yılda yäşeren räveştä ul vaqıtta 27 yäşendä bulğan Suha belän üylänüen xuplamağan idelär. Parijğa kilgän väkilçelek bügen irtän Fransiäneñ tışqı eşlär ministere Mişel Barnier belän oçraştı. Barnier elegeräk, fälästin väkilçelegeneñ Arafatnı kürüläre tabiği närsä dip beldersä dä, soñğı qararnı Arafatnıñ xatını häm tabiplar birergä tieşlär dip tä äytte. Bügen irtän xastaxanä süzçese Kristian Estripoh, Arafatnıñ xäle kinättän naçarlandı dip belderde.

Audio

"Prezident Yassir Arafatnıñ xäle 8-nçe Noyäberne 9-nçe noyäbergä totaştırğan tämdä naçarlandı. Ul tiräneräk komağa kerde. Monıñ närsägä alıp baraçağın äytü mömkin tügel."

Väkilçelek xastaxanägä kilep tabiplar belän Arafatnıñ xälen tikşergän bulsa da, häm Arafatnı kürgän dip xäbär itelsä dä, fälästin räsmiläre xastaxanädän ber nindi dä belderü yasamıyça kittelär. Şul arada iseme äytelmägän Fälästin räsmisenä tayanıp Arafat ülgän digän xäbär dä taraldı. Läkin, soñğaraq tışqı eşlär ministere Şaat CNNğa birgän ängämäsendä bu xäbärne kire qaqtı. Xärbi xastaxanäneñ väkile dä bu xäbär döres tügel dip belderde..

Färit İdelle, Praga.
XS
SM
MD
LG