Accessibility links

шимбә, 10 декабрь 2016, Казан вакыты 02:15

Amerikan mäxkämäse YUKOS mölkäten satunı tuqtatıp tora, Rusiä moña iğtibar itmiäçägen belderä


Quşma Ştatlarnıñ Texas ştatındağı ber mäxkämä YUKOS şirkäteneñ şikäyäten tikşerep, şul şirkätneñ bar xissäläre, yäğni aksiäläre belän eş itüne waqıtlıça tuqtatıp toru turında qarar çığardı. Mäxkämäneñ şuşı qararı Amerika Quşma Ştatlarınıñ bölgenlek qanunına nigezlänä häm xissälär belän eş itü älegä 10 köngä tuqtatıla. Şulay itep, 19-nçı dikäbrgä bilgelängän satışnı - YUKOSnıñ iñ ere öleşe "Yuganskneftegaz"nı "Gazprom" tarafınnan satıp alunı da amerikan mäxkämäse aldan uq qanuni tügel dip bäyäläp quya. Läkin Rusiä citäkçeläre YUKOS eşe Rusiä qanunnarı nigezendä xäl iteläçäk dip belderä.

Äye, xörmätle tıñlawçılar, räsmi Mäskäwneñ Texas ştatı mäxkämäseneñ qararına cawabı şul - YUKOS eşe fäqät Rusiä qanunnarı nigezendä genä qaralaçaq. Bu xaqta comğa könne ilneñ tışqı eşlär ministrı Sergey Lavrov belderde. Mäxkämä qararın ul "Rusiädäge investitsiä tirälegenä zian kiterü maqsatında kierenkelekne arttıru tırışlığı" dip bäyäläde. Ä Texas ştatınıñ Houston şähäre mäxkämäsendä comğağa qarşı töndä, YUKOS şirkäte xissäläre belän eş itüne 10 köngä tuqtatıp toru xaqında qarar itelgän ide. Mäxkämägä YUKOS citäkçelege üze möräcäğät itte, ul şulay Quşma Ştatlarnıñ bölgenlek qanunına nigezlänep şirkätneñ mölkäten saqlap qalırğa tırışıp qaradı. Mäğlüm ki, YUKOS aksionerları arasında amerikan şirkätläre wä watandaşları da bar, ä alarnıñ xoquqları Quşma Ştatlarnıñ qanunnarı nigezendä dä yaqlanırğa tieş dip isäpli YUKOSnıñ xäzerge citäkçelege. Şirkätneñ töp mölkäte Rusiädä urnaşqan bulu säbäple, räsmi Mäskäwneñ amerikan mäxkämäse qararın citdi qabul itüe ikele - Rusiädä Quşma Ştatlarnıñ moña qatnaşu xoquqı yuq dip kenä belderälär, Sergey Lavrov süzläre dä monı raslap tora. YUKOSnıñ üzendä dä monı añlıylar kebek. Houstondağı mäxkämä qararı belän alar başqa maqsatnı küz aldında tota. Dikäberneñ 19-ına YUKOSnıñ iñ ere şirkäte, "Yuganskneftegaz"nı satu bilgelängän häm anı Rusiäneñ däwlät qaramağındağı "Gazpromı" satıp alır dip kötelä. "Gazprom" isä moña kiräk aqçanı, yaqınça 13 milliard dollarnı, berniçä Könbatış bankı kergän finans törkemnän alırğa cıyınğan ide. Bu uñaydan "Deutsche Bank", ABN Amro, J.P. Morgan isemnäre atala. Alarnıñ isä Quşma Ştatlarda mölkäte şaqtıy, häm xäzer amerikan mäxkämäse YUKOS xissäläre belän eş itüne tuqtatıp torırğa bulğannan soñ şuşı Könbatış bankları "Gazprom"ğa YUKOSnıñ "Yuganskneftegaz"ın satıp alu öçen burıçqa aqçanı birmäskä buldıra ala. Rusiäneñ federal" milek fondı citäkçelege, 19-nçı dikäbergä bilgelängän satış, amerikan mäxkämäläre nindi genä qarar qabul itmäsen barıber ütäçäk dip belderde. Satış fäqät Rusiä mäxkämäse qararı belän genä kiçekterelä yä kire qağıla ala dip isäplilär Rusiädä. Bu oçraqta satış barı tik töp satıp aluçı dip kötelgän "Gazprom" üteneçe nigezendä genä kiçekterelä ala diärgä mömkin. Ägär dä anıñ Könbatış banklarınnan burıç aluı belän awırlıqları tusa, ul moña çınnan da bara ala. YUKOS citäkçelege mäxkämä qararın bäyän itü uñayınnan, bu xalıqara banklarnı häm başqa taraflarnı da satışta qatnaşu telägennän waz kiçügä etärer digän fiker beldergän ide. "Yuganskneftegaz" şirkäten satunı YUKOS citäkçelege üzen talaw bularaq bäyäli häm üz aksionerların yaqlaw maqsatında şuşı satışqa yul quymasqa tırışa.

Kärim Kamal
XS
SM
MD
LG