Accessibility links

җомга, 9 декабрь 2016, Казан вакыты 14:43

İranda prezident saylawları aldınnan bombalar şartlıy


Yäkşämbedä başqala Tähranda häm könyaq-könbatıştağı Ahvaz qalasında bulğan şartlawlar näticäsendä kimendä 10 keşe häläk buldı. Prezident saylawlarına sanawlı könnär qalğanda yañğırağan bu şartlawlar artında kem torğanı älegä tögäl bilgele tügel.

İran räsmiläre bu şartlawlarnı comğa köngä bilgelängän prezident saylawların özü tırışlığı dip atadı häm xalıqnı tınıçlıq saqlarğa çaqırdı. Yäkşämbe irtäsendä Xuzestan töbäge başqalası Ahvazda bulğan 4 şartlaw näticäsendä kimendä 8 keşe häläk bulğan, 50dän artığı yaralanğan. İran eçke eşlär ministrlığınıñ küzläw başlığı Möxämmät Xösäyen Motahar süzlärençä, bombalar ber-ber artlı 20 minut sayın şartlağan:

Audio (Möxämmät Xösäyen Motahar)

"Bombalarnıñ ikese Toraq ministrlığı häm Tözeleş idaräse bädräflärenä quyılğan bulğan. Öçençese – Xuzestan gubernatorı yortı qarşına. Bu öç şartlaw şähär üzägendä buldı. Dürtençese – cirle radio-televidenie räsmieneñ işek töbenä quyılğan bulğan. İşek açıluğa şartlağan."

Berniçä säğättän Tähranda çüp sawıtına yäşerelgän keçkenäräk bomğa şartlaw näticäsendä 2 keşe häläk bulğan, ikese yaralanğan. Mäglümät çaraları tağın 2-3 bombanıñ zararsızlandırıluı turında xäbär itte.

İran räsmiläre bu şartlawlar öçen ber-ber artlı ğäräp separatisların, Baatçlarnı, Ğiraq törkemnären ğäyepli. Eçke eşlär ministrlığı alarnı yaz köne Xuzestanda bulğan çualışlar belän bäyläde. Ğäräp azçılığı yäşägän bu töbäktä räsmilär milli tözeleşne üzgärtergä cıyına digän ğäybätlär taralğaç, April ayında anda çulışlar qabınğan ide. Ğäräplär belän politsiä arasındağı bäreleşlär näticäsendä 5 keşe häläk buldı, 200läbe qulğa alındı.

Yäkşämbe şartlawları belän April çualışları arasında bäyläneş bulu ixtimalı belän Londondağı İran-ğäräp tikşerenü üzäge citäkçese Aliriza Nurizadä dä kileşä:

Audio (Aliriza Nurizadä)

"Ahvaz çualışlarınıñ bastırıluı belän qänäğät bulmağan törkemnär, saylawlar yaqınlaşuğa üzlären işetterer, ul waqiğalarnı İran rejimına isenä töşerer digän farzlar bar ide. Şuña kürä bu waqiğalar bäyle bula ala."

Yäkşämbe şartlawları artında kem torğanı älegä bilgesez. Ahvaz guberantorı urınbasarı Rähim Fazilatpur İrannıñ student agentlığına äytüençä, 3 ğäräp törkeme şartlawlar öçen cawaplılıqnı üz östenä alğan. Başqa xäbärlärdä, cawaplılıqnı Ahvazdağı İnqilap şähitläre gvardiäse isemle separatislar törkeme alğan, dielä. Milli İminlek Şurası süzçese Ali Ağa Möxämmädi, "Şärq" gäzitenä, şartlawlar artında çit il xäräkätläre tora dide. Qayber küzätüçelär isä, bu şartlawlarnı, saylawlar aldınnnan säyäsi köçlären arttıru öçen, İrannıñ qadimi köçläre üzläre oyıştırğan dip farazlıy. Londondağı İran-ğäräp tikşerenü üzäge citäkçese Aliriza Nurizadä bu farazğa şiklänep qarasa da, soñğı şartlawlar namzätlärneñ bersenä – Möxämmät Baqır Qalibafqa iğtibarnı arttıra ala dip sanıy:

Audio (Aliriza Nurizadä)

"Yuğarı dairälärdä İranğa köçle xökümät kiräk digän süzlär yöri. Qalibafnıñ isemlektä buluı şunnan kilä. Keşelär üz iminlege öçen borçılıp, iminlek köçlärendä uñışlı eşlägän Qalibaf öçen tawışın birergä mömkin."

Düşämbedä İran prezidentı Möxämmät Xattami bar iminlek xezmätlärenä, yäkşämbe şartlawların oyıştıruçılarnı açıqlaw eşen tizäytergä färman birde.

-Ali Gilmi
XS
SM
MD
LG