Accessibility links

якшәмбе, 4 декабрь 2016, Казан вакыты 03:00

Qırğızstanda yaña çualışlar - xakimiatkä qarşı törkem xökümät binasın yawlap aldı


Qırğızstan başqalası Bişkäktä yänä xakimiat binasın yawlıylar, xörmätle tıñlawçılar. Anda prezidentlıqqa däğwa itkän Urmätbäk Barıqtabasov tarafdarları comğa irtän xökümät utırğan yortnı basıp aldı, alar ilneñ xäzerge xakimiatennän 10-nçı yüldä uzaçaq prezident saylawlarında Barıqtabasovnı nämzät bularaq räsmän terkäwne taläp itä. Soñraq militsiä xökümät binasın basıp aluçılardan arındırsa da, küzgä şul taşlana - prezident saylawları köne yaqınlaşqan sayın Qırğızstandağı ictimaği-säyäsi wäzğiat kierenkelänä bara.

Audio

Soñğı yartı yıl eçendä xalıq kütäreleşen yış kürep torğan Bişkäk comğa irtän yañasına şahid buldı - meñläp keşe xökümät yortın saqlağan militsiä xezmäkärlären çitkä etärep binanı yawlap aldı.

Audio

Höcüm itüçelärneñ zur öleşen yäşüsmerlär häm yäşläre yegerme tiräsendä bulğannar täşkil itkän, alar Urmätbäk Barıqtabasovnı räsmi töstä prezidentlıqqa nämzät itep terkäw taläbe belän çıqqan. Qırğızstan xakimiate elegräk, ul keşeneñ kürşe Qazağstan watandaşı buluın raslağan qäğäzlär bar dip, anı terkäwdän baş tartqan ide. Qırğızstan eçke eşlär ministrlığı soñğı çualışqa qarşı çaralarnı kiçekmästän kürergä buldı, yawlap alınğan bina şunda uq meñläp militsiä xezmätkäre tarafınnan çornap alındı, alarda utlı qoral bulmasa da, şuşı maxsus bülekçä çuqmarlar häm qalqannar belän qorallanğan ide. Eçke eşlär ministrı Morat Sutalinov, talawlar başlanğan oçraqta ut açılaçaq dip belderde häm binanı yawlap aluçılarnı bolay dip kisätte:

Audio, Morat Sutalinov

"Bez talawlarğa yul quymayaçaqbız, Bişkäktä yäşäwçe xalıq monı belep torsın, bez bar militsiäne ayaqqa kütärdek, alar xäzer täwlek buyı bar şähärdä kizü yöriäçäk" dip belderä Qırğızstannıñ eçke eşlär ministrı. Ul arada binada utıruçılar militsiä qamawın taşlar, şeşälär atıp qarşılasa da, ozaq ta ütmäde xökümät yortı inde alardan azat itelgän ide. Qırğızstannıñ üzäk saylaw komissiäse xäbärenä qarağanda, 10-nçı yüldä uzaçaq saylawlarda qatnaşu öçen ul bügenge köngä 7 nämzätne terkägän. Şularnıñ berse - ilneñ xäzerge waqıtlı citäkçese Qormanbäk Baqiev. Berük waqıtta ul Qırğızstan xökümäten dä citäkli, ämma bügenge höcüm waqıtında Baqiev binada bulmağan dip xäbär itelgän ide. Soñraq ul comğa xälläre turında bolay dip belderde:

Audio, Qormanbäk Baqiev

"Bügenge çualışlarnı, xökümät binasın yawlap alunı oyıştıruçılar näq menä Qazağstanda utıra häm alar elekke prezident Äskär Aqayevkä yaqın keşelär" di ilneñ xäzerge citäkçese Qormanbäk Baqiev.

Kärim Kamal
XS
SM
MD
LG