Accessibility links

сишәмбе, 6 декабрь 2016, Казан вакыты 11:23

Tıyılğan Natsional Bolşeviklar Partiäse äğzaları xökem itelde. Birelgän cazalar yomşaq


Mäskäv mäxkämäse tıyılğan Milli Bolşeviklar Partiäseneñ ber yıl elek prezident administratsiäse urnaşqan binağa köçläp kergännäre öçen qulğa alınğan 39 ağzasın 8-nçe dikäberdä ğäyeple dip taptı . Qayberlärenä genä törmä cazası birelde, qalğannarı irekkä çığarıldı. Advokatlar häm alarnıñ tuğan tumaçaları cazanıñ yomışaq buluın iqrar ittelär, läkin ber ük vaqıtta yäş aktivistlar ğäyepsez idelär dip belderdelär.

Xakimnärgä xökem qararın uqu öçen ike kön kiräk bulaçaq dip kötelsä dä, xökemgä tartılğannarğa şundıy ozaq kötärgä turı kilmäde. İke säğät eçendä 8 keşe 18 aydan alıp 42 ayğa qädäre törle törmä cazalarına xökem iteldelär, 31-e şartlı törmä cazasına xökem itelep, şunduq irekkä çığarıldılar. Yäş aktivistlarnıñ yaqınnarı xökem qararın tıñlağannan soñ söyeneçlären yäşermädelär, qararnı alqışladılar . Prokuror biş yılğa qädäre törmä cazası taläp itkännektän xökem qararı qatıraq bulır dip kötelgän ide. Advokatlarnıñ berse Dmitrii Agranovskiy alarnıñ ğäyepsez bulularına basım yasadı häm advokatlar törkeme xökem qararına şikayät belderäçäk dip äytte. Anıñ süzlärençä, ğäyeplelär binağa vizit yasayaçağın aldan beldergännär häm räsmilär belän söyläşü öçen köç qullanmıyça binağa kergännär. Ul radiobıznıñ Rus redaksiäse xäbärçesenä, kollegalarınıñ xökem qararı belän qänäğät buluların da äytte.

"Bez baxetle. Ğäyepsez keşelär ber yıl yabıp tottlar. Şulay da xökümetebezne belgännektän, alar ozağıraq ta totıla alırlar ide. Alar ber nindi dä cinayät eşlämädelär. Annan başqa 8 keşeneñ şul sanda öç xatın-qıznıñ äle dä törmädä totıluın onıtmasqa kiräk. Min yaqlağan keşelärneñ irekkä çığarıluına bik şatmın. Şulay da alar ber nindi dä cinayät eşlämägän bulsalar da, ber yıl saq astında totıldılar."

Milli Bolşeviklar Partiäse radikal yäşlär xäräkäte, alar xökümätkä qarşı protestlar oyıştıruları, säyäsi köndäşlärgä pamidor, yomırqa häm sok taşlauları belän tanılğannar. Xäzer xökemgä tartılğan 39 keşe 2004-nçe yılnıñ 4-nçe dikäberendä prezident administratsiäseneñ Mäskävdäge binalarınıñ bersen tınıç räveştä üz qullarına eläkterdelär. Alar işeklärne bikläp, Putin vazıyfañnan kit digän plakat kütärep çıqtılar häm räsmilärneñ portretların täräzälärdän taşladılar. Bu törkemne ximayä itkän ütä rus milätçese yazuçı Edvard Limonov oyışmanıñ 35 meñ taraftarı bar dip beldersä dä, başqalar bu san küpertelgän digän fikerdälär. Milli Bolşeviklar Partiäse neo-faşist oyışma bularaq 1994-nçe yılda oyıştı. Bügenge köndä ul üzen oppozitsion törkem dip atıy häm räsmi räveştä köç qullanunı kire qağa. Şulay da anıñ provokativ eşçänlege säbäple, Kremlneñ tırışlığı arqasında ul radikalizmda ğäyeple tabılıp iyün ayında tıyıldı. Mäskävdäge Panorama oyışması direktorı Vladimer Pribılovskiy birelgän cazalar qatı digän fikerdä.

"Xakimiätlär här närsädän qurqalar. Alar sotsial ğadellek xise köçle bulğan häm pomidor häm yomırqa taşludan başqa närsä eşlämägän berniçä yöz yäşüsmerdä qurqalar. Huliganizm äyye häm alarnı 15 tävlekkä xökem itü urınlı bulır ide. Läkin, 3 yılğa törmägä tügel. Kremldä här närsädän, şul sanda Milli Bolşeviklarnıñ pomidor taşlaularınnan da qurqınıç kürälär."

Lionov üze xökem qararı politik eçtälekle dip belderde. Xökem qararı yäş aktivistlarnı qurqıtunı küz aldında totqan xäldä, xakimiätlär bu maqsätkä ireşä almayaçaqlar kebek. Çönki, irekkä çığarılğan yäşüsmerlärneñ küpläre politik aktivlıqların dävam itteräçäklären belderdelär.

Färit İdelle, Praga.
XS
SM
MD
LG