Accessibility links

пәнҗешәмбе, 8 декабрь 2016, Казан вакыты 19:07

Dönya Säwdä Oyışması cıyını kileşü belän tämamlandı


Dönya Säwdä Oyışması utırışınıñ soñğı könendä yağni bügen nihäyät, aldağı yıllarda global säwdä ölkäsendä torğan qayber kirtälärne cimeräçäk kileşügä ireşelde. Anda qatnaşuçılar awıl xucalığında export subsidiälären 2013 yılğa qadär beterergä riza buldı.

Utırış 6 kön däwam itte, qayber söyläşülär tönnär buyı bardı. İñ zur qıyınlıq – Yevropa Berlegenıñ awıl xucalığına taşlamalardan baş tartırğa qarşı buluı ide. Ämma bügen, berlekneñ säwdä eşläre başlığı Peter Mandelson, 2013 yılğa qädär monı eşläp bulaçağın belderde. Kileşü şulay uq citeşterü sänäğäte häm xezmät kürsätü ölkäsenä qağıla.

Hong Kongta uzğan matbuğat oçraşuında Hindstannıñ säwdä ministrı Kamal Nath, kileşügä ireşü ciñel bulmadı, dip belderde:

"Söyläşülär küp yaqlı, kierenke häm ozın buldı."

Hindstan, AQŞ häm Braziliä belän berlektä, Yevropa Berlegeneñ fermerlarğa taşlamalarnı 2010nçı yılğa beterüen taläp itkän illär arasında ide. AQŞnıñ säwdä wäkile Rob Portman, alay da, 2013 yılğa qädär dä kötep bula, iñ möhime – waqıtnı bilgeläw, dide.

Hindstan ministrı, Yevropa Berlegeneñ täqdime belän qänäğät qalğanın belderde:

"Bez monı xuplıybız, çönki berençe tapqır, eş kürenä, hiç yuğı bezneñ döres yulda buluıbız kürenä. Alğa kiteş nindi bulır, monsın waqıt kürsäter. Kiläse berniçä ay detallärne eşläp beterügä kitäçäk. Älegä eşneñ qapqası ğına tözelde, ämma ul yaxşı qapqa."

Braziliä tışqı eşlär ministrı Celso Amorim, matbuğat oçraşuı waqıtında, qararnı saq qına xupladı, ämma tağın tulıraq mäğlümat kiräk, dide.

"Qäğäzdä bulğannarnı min citärlek dip bäyäli almıym. Berençedän, ul çiklängän, çönki detallär yuq. Taşlamalarnıñ ni qädär qısqartılaçağın da belmibez. Subsidiälärne beterü küpme waqıtqa suzılaçağı da mäğlüm tügel, tärräqi itkän illärdä bazarnıñ da ni qädär üsäçägen belmibez, şuña kürä – kileşü bik çikle."

Hong-Kongta Dönya Säwdä Oyışmasına qarşılıq belderep meñgä yaqın keşe uram cıyınnarı uzdırdı.

Kiçä isä qarşılıq çarasında qatnaşqan yözlägän keşene polisiä qulğa alğan ide. Alarnıñ kübese – Könyaq Korea fermerları bulğan. Distä yıllar Hong Kongnıñ andıñ köç qullanunı kürgäne bulmağan. Uram cıyınında qatnaşuçılar, Dönya Säwdä Oyışmasınıñ global bazarlarnı açu tırışlıqları barı tik bay illärgä häm zur şirkätlärgä fayda kiterä, häm bu ğadi eşçelär häm xäyerçelär xisabına eşlänä, dip sanıy.

alsu qormaş
XS
SM
MD
LG