Accessibility links

шимбә, 10 декабрь 2016, Казан вакыты 08:09

2005 yıl belän xuşlaşu


Ğäziz tıñlauçılar. Menä tağı da ber yıl üzıp ta kitte. Bu yıl bombalaular, suğış, saylaular, inqilaplar yılı ğına tügel, ä ber ük waqıtta dawıllar, cir teträwlär yılı da buldı. AQŞta Katrina dauılı 29 awgustta New Orleans şähärendä yäşäwçe yartı milion keşene evakivatsiälärgä mäcbür itte. 1300 keşe hälak buldı. 6 Üktäberdä Pakistannıñ Tönyaq Könçığışında häm Hindstannıñ Kaşmir öleşendä bulğan çir teträvendä 87 meñ keşe hälak buldı, millionağan keşe tübäsez qaldı.

Yaña yılda mondıy küñelsez waqiğälärne iskä töşerüneñ kiräge barmı dip äytüçelär küp bulır. Läkin, mondıy waqiğälärne istä totu, ber yaqtan, mondıy fäciğägä duçar bulmağannarnıñ Allağa şöker itülärenä kitersä, ikençe yaqtan, häläkät qobannarına quldan kilgän xätle yardäm itärgä kiräklegen kürsätä. Bu qısqa ğına tapşıruda ike misal kiterep ütärgä telim.

Bu yılnıñ 27 dikäberendä Sunami fäciğäsenä ber yıl tuldı. 220 meñ keşeneñ hälak buluına yäisä ezsez yuğaluına kitergän bu fäciğä üz waqıtında dönyanı der kiterde. Böten dönyada yardäm kampaniäse başlandı. Germaniädä xökümät monıñ öçen 500 milion Euro yardäm birde. Läkin, monda diqqätne xökmätneñ tügel, ä xalıqnıñ iğanäse cälep itä. 670 milion Euro aqça cıyılğan. Läkin, monda süz Sunami yäisä Pakistandağı cir teträw kebek tabiği häläkätlär turında ğına barmıy. Mohtaclar tirä yaqta bik küp.

Cämğiätneñ zäğif häm moxtaclarğa qulınnan kilgän qädäre yardäm itüe üzen mädäni dip atağan här cämğiätneñ wazıyfası. Cämğiättäge zäğif, yardämgä moxtac bocralarnıñ berse balalar. BMOnıñ ballar Fondı UNİCEFneñ ike atna elek kenä iğlan itelgän xisabına kürä, wazğiät yaxşırmasa 2015 yılğaça biş yäştän keçeräk 8 milion 700 meñ bala üläçäk. 17 dikäberdä Germaniäneñ ZDF yäğni ikençe räsmi kanalında Ein Herz für Kinder, Balalarğa yöräk cılısı digän iğanä cıyu programması ütkärelde. Bu programmanı monnan 27 yıl elek Axel Springer näşriäte başlap cibärgän ide. Şuşı waqıt eçendä 100 milion Euro aqça cıyılğan. Ul balalar belän bäyläneşle törle proyektlarnı finansiäläwgä sarıf itelä. Bu yılnı ul Sri Lanka, Rusiä, Afğanistan, Paqstan häm Tanzaniädä Yätim Balalarğa yardäm itüne maqsat itep quya. Cıyılğan iğanälärneñ ber öleşe Mäskäwneñ Tönyaq Könçığışında yaqınca 300 kilomtr yıraqlıqtağı Malaxovo yätimnär yortına, şul sanda yaña bina salu öçen sarıf iteläçäk. Bu proyektnıñ ximayäcese Mixail Gorbaçev.

Şulay qäderle tıñlauçılar, yaña yılğa kergändä, yardämgä moxtaclarnı onıtmıyıq. Räximle, märxämätle bulıyıq. Bu böten yıl däwam itsen. Qulıbızdan kilgän yardämne härdaim kürsätep torıyıq. Qazan bürosı xezmätkärlärenä, başqa xäbärçelärebezgä, şulay uq tıñlauçılarıbızğa isänlek tınıçlıq, mul häm imin tormış teläp qalam, raxmätläremne citkeräm. Här närsä telägenegezçä bulsın qäderle tıñlawçılar, millätttäşlär. Bezne onıtmağız.

Färit İdelle, Praga
XS
SM
MD
LG