Accessibility links

җомга, 9 декабрь 2016, Казан вакыты 16:50

Bosniälı Serb başlığı Radovan Karadciç qulğa alındı. Bu waqıyğadan soñ tuğan töp soraw, elekke Serb xärbi başlığı Ratko Mladiç ta qulğa alınıp, ğädellek aldına çığarılmasmı?

Şpion filmnarındağı ssenariylardan da üzgäräk anıñ macarası. 11 yıl buyı qaçıp yörgän Radovan Karadciç Montenegro taw mäğärälärendä yäşerenmägän bulğan.

Kiresençä, ul cämäğätçelekneñ näq üzägendä bulğan. Ul üzen Dr. David Dabiç dip atap, üzenä fälsäfäçe qiäfäte birer öçen saqal üsterep, alternativ medisina belän şöğellänep yäşägän. Ul ğına da tügel, ul sosial' tormıştan da çittä qalmağan. Karadciç ğädi xalıq kebek kiçlären eştän qaytqaç, yäisä yal waqıtlarında bik yış qına Belgradtağı Madhouse isemle barğa yöri torğan bulğan.

Bosniälelärneñ qanın suırğan Karadciç anda üz räseme yänäşäsendä suğış yuldaşı Ratko Mladiç räseme elenep torğan diwar yanındağı östäldä utırıp, qızıl şäräben eçep käeflänergä yaratqan.

Anıñ xalıq arasında yäşäp tä, küzläw xezmätkärläre, yäisä xalıq tarafınnan tanılmawına ışanu isä, älbättä awır.

Serbiäneñ atnalıq “Vereme” basmasında analítik maqälälär yazğan Deyän Anastasiewiç, Karadciç maxsus bäyläneşlärsez, yalğız ğına yäşi almawın äytä:

“Karadciçqa yalğan pasport häm qäğäzlärne buldıruda kemder yärdäm kürsätkän. Äle pasport häm yalğan qäğäzlärdän qala, qulğa alınmaw öçen niçek xäräkät itü turında täcribäle keşe yärdäme kiräk. Bolar isä osta keşelär tarafınnan ğına täemin itelä ala. Şunlıqtan, küzläw idaräseneñ bu eşkä qulı tigän dip äytep bula.”

Karadciçnı küzläw idaräse faş itkänlektän, Karadciçnıñ üz bäyläneşläre aña xıyanät itkän bulıp çığa. Älege xäl isä, Ratko Mladiç ta tizdän faş itelmäsme digän soraw tudıra.

8 yıl elek Mladiçnı kürü oçraqları yäşerelmi ide. Soñğı tapqır anı 2000 yılda şähärdä futbol matçında qatnaşuı xäbär itelgän ide. Şul yıldan soñ Serb xärbi başlığınıñ eze tabılmadı.

Läkin şuşı könnärdä genä Serbiädäge keşe xoquqları aktivistı Nataşa Kandiç belderüençä, Serbiä küzläw idaräse Mladiçnıñ qayda buluın tögäl belä. Ä anı tapşıru mäsäläse isä barı tik säyäsi teläktäşlekkä bäyle ikän.

Belgradta Serb xärbi citäkçese Mladiç Karadciçtan da yaqşıraq saqlana digän imeş-mimeşlär eşetelgän ide. Bu xäl zamanında döres bulğandır. Läkin Anastasiewiç äytüençä, soñğı arada Serbiädä bulğan xärbi inqıylablar, elekke başlıqlarnıñ kübese urınınnan alınğannan soñ xällär inde üzgärgän.

"Xärbi ölkädä şaqtıy üzgäreşlär kertelde. Şulay uq andağı keşelär dä alışındı. Ägär dä Mladiç bügenge köndä xärbi başlıqlar belän berär nindi eşe çıqsa, ul anda elekke iptäşlären tabalmayaçaq. Minemçä, Serbiä armiaseneñ bügenge könbatış tärteben kürügä anıñ bik nıq açuı kiläder."

Läkin Belgrad xakimiate xäzergäçä Karadciç, Mladiç, yäisä başqa suğış cinayätçelegendä ğaeplängän keşelärneñ Serbiä küzläw idaräse aşa saqlanuwın kire qağıp kilä ide.

Serbiäneñ isä saylaw mömkinçelege küp tügel. Yewropa berlegenä äğza bulu yulında Serbiä aldında suğış cinayätçelären tapşıru mäsäläse gel kirtä bulıp tora. Serbiädän tapşırıluı taläp itelgän 3 keşeneñ 2se tapşırıldı. Ä analítik jurnalist Anastasiewiç isä, xökümätneñ bu eşne yomğaqlap qalğan soñğı suğış cinayätçese Mladiçnı kiçekmästän tapşıraçaq dip ışana.

Ul çağında Karadciç yörgän Madhouse barınıñ xucası da, bälki Karadciç fotosınıñ qadağı qıyşayğan diwardan, qalğan ike räsemne dä alıp taşlar.

бәйле язмалар

XS
SM
MD
LG