татарстан

Yäşlär könen härkem üzençä faydalandı

27.06.2007

röstäm isxaqi

Tatarstan başqalasında studentlar ğomumi xalıqnıñ öçtän beren täşkil itälär. Bu xaqta Qazan merı İlsur Metşin yäşlär köne uñayınnan äytelgän qotlawında da iskä alıp kitte. 27 iyündä Qazandağı 180 meñ studentnı, mäktäp yäşendäge yäki bötenläy ber uqu yortına da qaramağan yäşlärne respublikanıñ citäkçeläre, türäläre qotladılar, aldınğı yeget-qızlarğa büläklär birdelär. Respublika başqalasında yäşlärgä bağışlanğan çaralar, tamaşa-şoular köndezge 12дән alıp töngä qädär däwam itte. Bäyrämneñ töp qunağı Mäskäwdän Qazan tarafınnan çaqırtılğan böten Rusiä yäşlärenä tanış yoldız Maksim buldı Yäşlär bäyräme bulğaç sez gel uyın-kölke genä buldı dip añlıy kürmägez. Ğomumän, ayırım könne kemnärder bäyräme itep bilgeläwgä qarşı fikerlär dä işetelde. - Mondıy ayırım bäyrämnärne yaratıp betermim inde. Xatın-qızlar öçen ayırım kön, yäşlär, balalar öçen ayırım kön. Läkin yäşlärneñ ähämiäten kürsätergä bu kön kiräkter dip uylıym. - di Bötendönya tatar yäşläre forumı byurosı räise İlşat Säetov. Şuña da qaramastan ul yäşlärgä cılı süzlären citkerde. Tatar yäşläre forumına kilgändä, bu könnärdä ällä ni möhim waqiğalar bulmağan. Çönki… - Aktivistlar, qatnaşuçılar kübese studentlar. Cäy könne rayonğa-awılğa kanikulğa qaytıp kitä, kem eşli digän sıman… İlşatnıñ süzlärennän kürengänçä barlıq studentlarda bäyrämnären qalada bilgelämilär, respublikanıñ awıl-rayonnarında bäräñge töbe öyep, kötü kötep, kiçen klubqa çığıp 27 iyünne ütkärep cibärälär. Qazanda isä törle çaralar ütkärep yäşlär könen härkem üz faydasına qullanırğa tırışa. Säyäsi firqälär şulay uq saylawlar aldınnan köçlären yäş buın belän arttırmaqçılar. “Tatar-inform” mäğlümat agentlıygında yäşlär säyäsätenä bağışlanğan tügäräk östäldä deputatlar, “Berdäm Rusiä” firqäse äğzaları belän jurnalistlar yäş buınnıñ säyäsäten añlarğa tırıştılar. Tik şul uq İlşat Säetov äytkänçä, yäşlärneñ säyäsi eşçänlege kimi ikän. Ul monı säyäsät belgeçe bularaq äytte. - Firqä äğzaları yäşlär öçen barsında eşlibez disälär dä, bu alarnıñ saylaw aldınnan ğına qıçqıruları. Moña ışanırğa yaramıy. Ul yaqtan yäşlär başqaçaraq qaraşta, alar pensionerlar kebek kommunistlarnı, byudjet eşçeläre “Berdäm Rusiä”ne saylamıylar. “Yarar, yarar!” – dilär dä saylaw könne üzgärälär dä quyalar. İlşat Säetov şulay di. Annan soñ yäşlärneñ şöğelläre, xobbiları da başqa bit. Şuña qarap yäşlär bäyrämendä Qazan xakimiäte törle küñelle startlar oyıştırdı. Yeget-qızlar ekstremal', brek-dans kebek zamança sport törläre buyınça ostalıqların kürsättelär Brek-dans xäzer bik modno, tekä sanala dip süzen däwam itte breykker Marat: - Festival'lär ütkärälär, xäzer yäşlär şuña tartıla. Xip-xop yunäleş üsä bara. Tübän Qama yegete Marat iyül başında Qazannıñ “Tatneft'-Arena” boz sarayında uzaçaq “Brekdans” buyınça xalıqara çempionatta da qatnaşaçaq. Biyuçe yegetlärne häm yeget-qızlarnı yäşlär bäyrämendä başqalanıñ tanılğan di-dijeylar çit il, rus köylärenä bietäçäk. Şularnıñ berse “Arena”, “Piramida” kebek tönge klublarda tanış di-djey Lilu da “Azatlıq”kta qunaqta bulıp kitte. - Härwaqıt şat küñelle bulığız yäşlär. Qartayğaç sağınıp söylärlek bulsın! Qazannıñ tanılğan di-djeyları arasında menä şundıy tatar qızları da bar ikän äle. Röstäm İsxaqi

уртаклаш:

уртаклашу турында

текст зурлыгы

авторның башка язмалары

башка язмалар

яңалыклар

соңгы язмалар