Ирек Мортазин иректән ерагая

“Мин аның үзе белән аралаша алмыйм. Әмма бүген Ирекнең ачлык игълан итүе турында әйттеләр. 3 сентябрьдә колония идарәсе аны 5 көнгә изоляторга утыртырга дигән карар чыгарган. Бүген аны аннан чыгарасы иделәр. Хәзер җәзаларның үтәлешен тикшерү федераль идарәсе аны хәзер сөрген дип аталган хәзерге статусыннан чын колониягә күчерү турында карар чыгарган. Иреккә бу карарны күрсәткәннәр. Иртәгә аның янына адвокат бара”, ди Ситдикова.

Ике ай элек Мортазин Мамадыш районындагы Дегетле авылыннан Менделеев районындагы башка авыл-колониясенә күчерелгән иде.

Ике очрактан соң юл колониягә

Татарстанның җәзаларның үтәлешен тикшерү федераль идарәсе матбугат үзәге башлыгы Инга Мазуренко сүзләренчә, Мортазинны изоляторга кичке тикшерүгә килмәгәне өчен утыртканнар.

Моңа кадәр Мамадыш районында сөргендә булганда ул бер тапкыр мондый изоляторда утырган инде. Ул вакытта Мортазин колония идарәсе рөхсәтеннән башка, шулай ук сөргендә булган, әмма аерым фатирда яшәүче Геннадий Мамонтов янына барган булган.

Билгеле булганча, Дәүләт шурасының элекке депутаты Геннадий Мамонтов фатир сату-алу эшләрендә алдашканы өчен җаваплылыкка тартылды. “Тәртип бозып ике тапкыр изоляторга ябылганнарга мәхкәмәдән җәзаларын катлауландыруны сорарга хакыбыз бар”, дигән Инга Мазуренко “Вечерняя Казань” басмасына.

Журналистлардан башланган проблема

Ирек Мортазинның якыннары аңа карата басымның август ахырында башлануын әйтә. Нәкъ шул вакытта аның янына сөргенгә Мәскәүнең НТВ каналыннан журналистлар килеп, бер сәгать әңгәмә алганнар. Әмма тапшыру әле дә эфирга чыкмаган. Ләйсән Ситдикова исә, журналистларның килүендә ниндидер хәйлә бар, ди.

“Ирекнең әйтүенә караганда, Мәскәүдән килгән журналистлар чынлыкта Чаллы шәһәренең “Эфир” телеканалы хезмәткәрләре булып чыккан. Бу видеоязма эфирга чыкмады, күрәсең ул кирәкле кешеләр кулына барып җиткән. Ирекнең анда әйткән сүзләре кемгәдер ошамаска мөмкин. Хакимияттәгеләр аны сөргенгә җибәргәч тә тынычлана алмый. Кешене ирегеннән мәхрүм итү генә җитми, гел “чеметеп” торырга кирәк”, ди Ситдикова.

Мортазинга басым сәясәт белән бәйлеме?

“Мемориал” хокук яклау үзәге Ирек Мортазинны сәяси тоткын дип бәяли. Моңа өстәп кайбер сәясәт белгечләре дә, соңгы арада Мортазинга басым башлануны тиздән узачак муниципаль сайлауларга бәйли. Янәсе Мортазин сөргендә булып та, интернет аша халыкка кирәкмәгән идеяләр таратырга мөмкин. Сәясәт белгече Рәшит Әхмәтов, моның белән килешми.

“Мортазин сөргендә булып, сайлауга нинди үзгәреш кертә алсын ди инде? Иң күбе интернетка яза ала. Моны ул басым булса-булмаса да эшли. Гәрчә халык аны оныта да башлаган иде инде. Элек Мортазинны яклап интернетта блогерлар берлеге төзелгән иде, акцияләр үткәрелде. Ә хәзер тып-тын. Дуслары да ләм мим”, ди Рәшит Әхмәтов.