Мисырда очкыч казасында һәлак булганнарның бер өлешен Каһирәдән Петербурга кайтарып, мәетләрне тану башланды. Бу хакта Гадәттән тыш хәлләр министрлыгының психологик ярдәм бүлеге башлыгы Юлия Шойгу хәбәр итте.
31 октябрь "Когалымавиа" һава ширкәтенең Мисырның Шәрм әш-Шәйх курортыннан Петербурга кайткан очкычы җимерелеп төшеп 224 кеше булды. Алар арасында 132 кеше Петербурдан, 46 - Ленинград өлкәсеннән, 34 - Русиянең башка төбәкләреннән (Новгород, Смоленски, Карелия, Красноярски). Петербур губернаторы Георгий Полтавченко 9268 рейсы юлчылары истәлегенә һәйкәл кую тәкъдиме белән чыкты, соңгы карарны аларның туганнары кабул итәчәк.
Дәүләтара авиация комиссиясе башкарма мөдире Виктор Сороченко, һәлакәт урынын тикшергәч, очкычның һавада ук шартлап төшкән булуы ихтимал, дип белдерде. Русия һәм Мисыр белгечләре "кара тартма"ларны тикшерә.
Петербурда өч көнлек матәм дәвам итә. Кичә шәһәрнең Сарай мәйданына һәлак булганнарны искә алыр өчен йөзләгән кеше җыелды.