Istanbulda iftar mäclese uzdı

Restorannı ber uyğır xanım citäklägänlektän aşlar töreklär künekmägän läzzättä bulsa da, maqsat aşaw bulmağanlıqtan qatnaşuçılar qänäğät buldılar.

İftar mäcleseneñ matdi yağın Ramil Mäwlitov citäklägän «Tatarstan» säwdä yortı, oyıştıru eşen İdel-Ural cämğeyäteneñ yaña citäkçese Gülten Urallı alıp bardı. Şuşı iftar mäclesendä qatnaşuçılar arasında räsmi şäxeslär dä bar ide. Alar - İstanbul merı Gülerneñ ike yärdämçese Murat Kocabaş belän Mustafa Altıntaş.

Mustafa Altıntaşnıñ Tatarstannan kilgän yäşlärgä yärdäm qulı suzuı, çığışı belän Noğay tatarı buluı ayıruça diqqatne cälep itte.


Tatarstannıñ İstanbuldağı wäkile Radik Ğıymatdinov Qazanda bulu säbäple, anıñ yärdämçese Aydar Ğäşiğullin wäkillek itte.

Şuşı iftar mäclesendä yözdän artıq keşe qatnaştı. Törkiädä uqığan tatar studentlarınıñ sanı isä 5tän artmadı. Şulay uq Qıtay, Yaponiadän Törkiägä küçep urnaşqannar da bik siräk ide. Törkiädä yöz yıl elek küçep awıllarğa urnaşqannarnıñ buınnarı da, tatar telen äle dä qullanğan Yıraq Könçığış tatarları da bar ide.

İstanbuldağı iftar mäclesendä qatnaşqannar arasında yıraqtan kilgän qunaqlar da bar ide. Şularnıñ berse professor Nadir Däwlätneñ yaqın dustı AQŞ-ta yäşäwçe pensiädäge neft injenerı 82 yäşlek Rawil Säliäxtmät ide. Ul da Qıtayda tuğan. Äti-änise Käşşaf belän Mädinä Säliäxmätlär Şanhayda tatar cämğeyäteneñ aktiv äğzaları bulğan. Alar ulları belän bergäläp 1950 yıllarda Törkiägä küçengännär. Annarı ulları Rawil isä AQŞ-qa urnaşqan.


Qunaqlar arasında iğtibarnı cälep itkän başqa ber qunaq - Fähim Wäliev ide. Ul ulı Ramil belän sıy mäclesenä qatnaştı. Fähim äfände Norlatta yäşi. Biredä berençe mäçetne salğan. Xäzer isä mädräsä salu belän şöğellänä. Kiläse yılda Norlat mädräsäse açılaçaq di.

İftar mäclesenä Tatarstannıñ Yäşel Üzän şähärennän eşmäkär Ramil Wafin da bar ide. Ul İstanbulda yäşägän qızın kürergä kilgän. Qızı biredä ber noğay tatarı yegetenä kiyäwgä çıqqan. Töreklär Rusia qızların alğanda, tatar yegetläre, alar bik az sanda bulsa da, tatar qızları belän öyläneşergä tırışa.

İftar mäclese Dr. Oruç Güvençneñ muzıyqa törkeme TÜMATA konsertı belän tämamlandı. Gültän Urallı monan soñ 15 öktäberdä xäter könen uzdıru planı turında da äyte.