Менделеевскида канун бозулар яшерелә
Менделеевски каласындагы 1912 нче сайлау бүлегендә күзәтүчеләр өчен шартлар тудырылмаган. Сайлаучылар бүлекә килгәч, бюллетеньнәр алганы, имзалар куйганы күзәтүчеләргә күренми. Бер сайлаучы тартмага өч бюллетень салмакчы булган. Ләкин сайлау кәгазьләре идәнгә төшеп китә. КПРФ күзәтүчесе Нурия Дюжакина әлеге бюллетеньнәрне күтәрә һәм "бу - сайлауны бозу" дип белдерә. Менделеевски сайлау комиссиясе вәкиле Рафаэль Сабитов бюллетеньнәрне Дюжакина кулыннан тартып ала.
Менделеевски территориаль сайлау комиссиясе әгъзасы, КПРФ күзәтүчесе Равил Сабиров "Кечкенә шәһәрләрдә сайлаучы аз килә. Безгә теге яки бу сәгатькә күпме сайлаучы килүен дә әйтергә теләмиләр, сайлаучылар имзалары белән танышырга рөхсәт бирмиләр", ди.
Әлеге шәһәрнең берничә урынында "Бердәм Русия"нең сайлау белән бәйле реклам такталары эленеп тора. Аларның берсе "Зеленая" урамында иде.
"Казан Арена"дагы концерт көндезге 4тә башланды. Урамда яңгыр, салкын. Кемдер китә, кемдер халык арасында биеп җылына. Алып баручылар Игорь Николаев, Сергей Лазарев чыгышы көтелә дип кыздыра. Араларында бер татар йолдызы булачак. Кичкә таба Салаватның чыгышы көтелә, диде алып баручылар.
Полиция хезмәткәрләре Азатлыкка мәйданга 50 мең кешенең килүе көтелә дип әйтте.
Хәзерге вакытта Согуд Гарәбстанында хаҗда булган татарстаннар да бүген тавыш бирде. Татарстан Диния нәзарәте рәисенең урынбасары Рөстәм Батров хәбәр иткәнчә, алар Җиддә шәһәрендә урнашкан Русия консуллыгында сайлаган.
Уфада 26нчы сайлау бүлегендә 132нче мәктәп директорының күпләп бюллетеньнәр ташлавы ачыкланган. Казанда 37нче сайлау бүлегенә кешеләрне кызыл автобусларга төяп китергәннәр.
Казанның 315 санлы сайлау бүлегендә тавыш бирүчеләргә сайлаганлыкка белешмә кәгазе бирәләр, дип хәбәр итә "Idel.Реалии"
Башкортстанда 18:00га рәсми мәгълүматка күрә 53 проценттан артык кеше тавыш бирде. "Голос" хәбәр иткәнчә, җирле сайлау бүлекләре җибәргән саннар еш кына күзәтүчеләр, комиссия әгъзалары һәм медиа вәкилләре саннарына туры килми. Бу очракларда сайлауга килүчеләр саны арттырылып җибәрелә, ди "Голос".
"Голос" хәбәр итүенчә, Казанның 299 санлы сайлау бүлегендә "Өстәмә исемлекләр" өстәленә килеп, "мин студент" дип әйтеп, теләсә нинди КФУ тулай торак адресын атап, сайлау кәгазен алырга мөмкин. Чынбарлыкта студент икәнлеге тикшерелми. Камера исә икенче якка борылган, ул бу өстәлне күрми кала.
Казанның 55 санлы бүлегеннән күчмә тартмаларга салу өчен ничә бюллетень бирелгәнлеге билгесез
Казанның 55нче сайлау бүлегендә "Родина" фиркасеннән күзәтүче Алексей Чесноков сүзләренчә, аларга күчмә сайлау тартмасы белән китүчеләргә ничә бюллетень бирелүе турында мәгълүмат җиткерелмәгән.
Сайлау комиссиясе рәисе аның бу сүзләренә җавап итеп күзәтүчеләрнең берни дә сорамавын белдереп, бу дәгъвадан котылырга тырышты. Башка күзәтүчеләр дә сайлау комиссиясе җитәкчесенең тиешле мәгълүматны бирмәвен белдерде.
Чесноков сайлау урынындагы канун бозулар теркәлгән документны комиссия рәисенә тапшыра алмады. Рәис Татарстан Үзәк сайлау комиссиясенә мөрәҗәгать итергә кушты.