Yäşel Üzän şähärendä yäşäwçe tıñlawçıbız Änürbik Ğöbäydullinnı tatar mäğlümat çaraları yaxşı belä. Milli canlı tıñlawçıbız äledän äle “Azatlıq” radiosınıñ Qazan byurosına da şaltıratıp üz borçıluın belderä, fiker-täqdimnäre belän urtaqlaşa. Soñğı waqıtlarda “Azatlıq”nı hiç tıñlap bulmıy, bik naçar işetelä, nindi dä bulsa çaralar küregez inde dip Änürbik äfände Yaña Ğasır radiosı citäkçelegenä dä möräcäğät itep qarağan. Läkin kiräkle çaralar kürelmägäç, ul çärşämbe irtäsendä “Azatlıq”nıñ Qazan byurosına kilde. Änürbik äfändene üzen tıñlıyq:
“Azatlıq”nı min bik küptännän tıñlıym. Elek bik tomalıylar anı, qolaqnı radioğa “tığıp” diärlek tıñlıy idek. Xäzer, Allağa şöker, tıñlaw mömkinçelekläre arttı. Kiç ike tapqır, irtän dä tıñlıy alabız. “Bolğar FM”da tapşırularığıznı birü bik küplärne söyenderde. Ämma soñğı waqıtta “Bolğar FM”dağı tapşırular bik naçar işetelä başladı. Nindider texnik säbäptänme, ällä kürşe köçle radiostansiälär “qısamı”, anısın belmim. Ämma min Qazannan 35 çaqrımdağı Yäşel Üzändä torıp ta “Azatlıq”nı tıñlıy almıym. Bik teläp tä, yışlıqların belep tä tıñlıy almıybız. Qaywaqıtta aptırap 6 qatqa da menep tıñlap qarıym, başqa bülmälärdä dä ezläp mataşam. Bik tırışa torğaç, tıñlıym inde. Ämma ğadi tıñlawçı ФМ91,50 yışlığın taba da, äy monda rusça, başqa radiolar ikän, bezdä totıp bulmıy ikän di dä sünderä. Çallıda da şulay. Ä şul uq waqıtta küptän tügel Yaña Ğasır telekompaniäse tarafınnan açılğan rusça söyläwçe “Lоve radio” bik yaxşı işetelä. Qazanda da, Çallıda da, Yäşel Üzändä dä. Bu bezneñ tatar milläten kimsetü dip sanıym min. Min täqdim itäm Qazanda ğına bulsa da “Lоve radio” häm Azatlıq”nıñ yışlıqların urınnarı belän alıştırırğa.“Azatlıq” radiosınıñ üzençälekläre turında Yäşel Üzändäge tıñlawçıbız bolay dide:
“Azatlıq” - tatar telendä dönya xäbärlären söyläwçe berdänber radio! “Tatarstan”, şul uq “Bolğar FM” radioları Kreml'däge, awıldağı xäbärlärne genä äytä. Ä bezgä, tıñlawçılarğa, dönyadağı xällärne dä beläse kilä bit. “Azatlıq”qa telägebez - şulay däwam itegez kiläçäktä dä. Ayırılmasqa yazsın ide sezdän. Dönya xällären, dönyadağı üz urınıbıznı sezgä qarap qına belä alabız.Xalıq isemennän yörüçe “Azatlıq”nıñ tuğrı tıñlawçısı, Yäşel Üzändä yäşäwçe Änürbik Ğöbäydullin buldı.
Al'bina Zäynulla
