İzrail xärbi köçläre bügen Xizbulla kontrolendä bulğan könyaq Libandağı Bint Jbeil şähärennän çığıp kitte. Xärbi citäkçelek süzlärenä qarağanda, xärbi çaralardan soñ çığıp kitü – aldan bilgelängän plan nigezendä bulğan, İzrailneñ Libannı üz kontrolenä alu niäte yuq, dip bilgeläde. Bu yaqlarda soñğı könnärdä iñ qatı bäreleşlär bardı. 26 yül könne biredä İzrailneñ 9 xärbie häläk buldı.
Libannıñ könçığışı bügen utqa totıldı. İzrail xärbi köçläre mäğlümatlärenä qarağanda, comğa könne könyaq Libanda Xizbullanıñ 26 suğışçısı üterelgän. Xizbulla isä berençe tapqır yaña Xaybar-1 digän, yıraq arağa oça torğan raketa qullandı.
Libannıñ tirä-yaq möxitne saqlaw ministrı Yakub Sarraf, İzrailneñ könyaq Libanda yağulıq saqlağıçlarına yasağan höcümnäre näticäsendä Urta Diñgezdä tirä-yaqqa zur ziyan kilde, dip belderde. 2 atna eçendä diñgezgä 15 meñ tonna eşkärtelmägän neft aqqan.
Britaniä premyer-ministrı Tony Blair belän bulğan oçraşudan soñ AQŞ prezidentı George Bush, Libanğa xalıqara iminlek saqlaw ğaskärlären mömkin qadär tizräk cibärü kiräk, dip belderde. Bügen AQŞ däwlät sekretare Condoleezza Rice Yaqın Könçığışqa suğış başlanğannan birle inde ikençe tapqır bara, dip xäbär itelä. Anıñ İzrail häm Liban citäkçeläre belän oçraşuı kötelä.
