Accessibility links

җомга, 9 декабрь 2016, Казан вакыты 03:10

Tatarstan wäkilçelege Singapurdan qayttı


Şuşı könnärdä Tatarstan Premyer-ministrı Röstäm Miñnexanov citäkçelegendäge Tatarstan wäkilçelege Singapurdan qayttı. Alar anda Rusiä-Singapur iqtisadi forumında qatnaşa.

Rusiä säwdä häm iqtisadi üseş ministrı German Gref citäkçelegendäge Rusiä wäkilçelege 600 keşedän tordı, şunıñ 22 se Tatarstanlılar. Rusiä-Singapur forumında Tatarstannıñ iqtisadi täcribäse belän Premyer-ministr Röstäm Miñnexanov, tözeleş, arxitektura häm toraq kommunal' xucalıq ministrı Marat Xösnullin, şähäre merı İlsur Metşin, barlığı 22 keşe tanıştırdı.

Älege forum eşendä qatnaşqan premyer-ministr tışqı elemtälär buyınça yärdämçese İskändär Möflixanov oçraşunıñ niçek uzuı, monda nindi mäs'älär kütärelüe turında Azatlıqqa bolay dip belderde.

“Forum barışında, Tatarstanlılar Singapurnıñ ministr-ostazı Li Quan YU belän oçraştı. Äytergä kiräk, 84 yäşlek Li Quan YU Singapurnı ayaqqa bastırğan keşe. Ministr Tatarstandağı "Alabuğa" maxsus iqtisadi zonasınıñ zur tizlek belän üsüen äytte. Singapur anıñ tözeleş plannarın äzerläwdä yärdäm itkän ide. Söyläşü barışında Li Quan YU Rusiä belän bu yünäleştäge xezmättäşlegen alğa taba däwam itäçägen äytte. Singapurlıylar kiläçäktä dä üz täcribäläre belän urtaqlaşırğa, Rusiä öçen belgeçlär äzerlärgä wäğdä birä. Şulay uq säfär qısalarında Röstäm Miñnexanov Singapurnıñ Prezidentı belän dä oçraştı. İke yaqlı söyläşü barışında, maxsus turistik töbäklär buldıru, sotsial' yünäleşlär, ayırım alğanda sotsial' toraq ölkäsen tormışqa aşıru mäsäläre qaraldı. Bu ölkädä Singapur inde alğaraq kitkän. Ämma qayber tarmaqlarda alar bezneñ täcribä belän qızıqsındı. Yaqın arada Singapurlıylar Qazanğa kilep, ike yaqlı eşçänlekne däwam itärgä uylıybız.”

Şunı äytergä kiräk, kiläçäktä Tatarstan Singapur täcribäse kübräk qullanırğa teli. Singapur - dönyada küplärdä zur qızıqsınu uyata torğan il. 40 yıl elek ul eşne yuqtan başlap, bernindi tabiğät baylıqları bulmawğa qaramastan, iñ yuğarı däräcägä kütärelde. Xäzer toraq mäsäläsen çişü, belem birü, sälämätlek saqlaw ölkäsendä zur burıçlar quyğan. İldäge xalıqnıñ 80 protsentı Tatarstandağı sotsial' ipoteqa kebek programma buyınça fatirlar belän tä'min itelgän.

Tatarstan Premyer-ministrı yärdämçese Röstäm Möflixanov şulay uq säfär barışında Singapurda yäşäwçe tatarlar belän dä oçraşqan.

“Min üzem anda yäşäwçe Ruşan Biçuri belän oçraştım. Min aña Tatarstan xäbärlären söylädem, anı üzebezgä qunaqqa çaqırdım. Çit cirdä yäşäp tä ata-anasınıñ telen onıtmağan. Rus telen belmäsä dä, tatarça bik şäp söyläşä.”

Premyer-ministrı yärdämçese Röstäm Möflixanov Singapurda yäşäwçe millättäşebez Ruşan Biçurinıñ saf tatarça söyläşüenä şaqqatıp qaytqan. gölnaz Şäyxetdin

XS
SM
MD
LG