Tarixi mirasnı saqlawğa turizmnann kergän aqça ğına citäme?

Turizm yunäleşe üsä barğan illär xäzar arta. Bilgele kemder diñgez yarların üz itsä, qayberlär tarixi häykällär belän tanışırğa bara çit cirlärgä. Läkin turistlarğa kürsäterlek tarixı mirasnı äle saqlaw da kiräk. Bu atnada Qazanda bara torğan Bötendönya mirası şähäre oyışmaları kongressında şul xaqta qayğırttılar - çärşämbe könne şaqtıy üzençälekle çara uzdı. Şähär başlıqları turizmnan kergän aqça tarixi mirasnı saqlawğa yärdäm itä alamı digän mäs'älä xaqında fiker alıştılar.

Bu açıq utırışnı Bötendönya turizm oyışmasınıñ turizmnı üsterü departamentı citäkçese Euxeno Yunis alıp bardı. Şähär başlıqları aldında Tarixi mirasnı saqlawğa turizm ğına citäme digän soraw quyıldı. Häm monıñ nigezendä Miras şähärlärenä kergän 5 qalanıñ merı üzlärendäge täcribä turında söylädelär. Ayırım alğanda, İspaniäneñ Aranxues şähäre başlığı Dionisio Bayesteros, Vengriäneñ Budapeşt şähäre merı Kabor Demski, V'yetnamnıñ X'yu şähäre Şura citäkçese Nguen Kim Dong, Ekvadornıñ Kuyınko şähäre citäkçese Marselo Kabrera Palasios häm Qazan şähäre Başqarma komitetı citäkçese Marat Zahidullov bu mäs'älädä fikerläre belän urtaqlaştılar. Bötendönya mirası şähäre oyışmaları citäkçese Marselo Palasios:

Miña qalsa bügenge köndä mädäni miraslarnı saqlawğa turizm üseşe genä citäme digän sorawğa ber törle genä cawap yuq

Quyınqo şähäre citäkçese Marselo Palasios fiker alışqanda merı kübräk aqça mäsäläsenä häm turistlarnı qabul itü yunäleşenä basım yasarğa soradı.

Şähär citäkçeläreneñ barısı da turizmnan kergän aqçalarnıñ bik az buluın häm hiç kenä tarixi mirasnı saqlawğa bernindi öleş kertä almıy dip belderdelär. Qazan Başqarma komitetı citäkçese Marat Zahidullovtan tış, küpçelek merlar üz märkäzlärendä turizmnı üsterü xaqında älläni zur xıyallarğa birelmädelär. Marat Zahidullov uzğan yıl Qazan 600 meñ turistnı qabul itte. Ämma bu az, anı 2 tapqırğa arttırırğa kiräk dip belderde. Şul uq waqıtta soñğı yıllarda Qazan belän tanışırğa kilüçelär 2 tapqırğa artqan, ayıruça 1000 yıllıq yubileydan soñ küzätelä ikän bu.

İspaniädän Dionisio Bayesteros bez turistlar yärdämendä aqça eşli almıybız. Barı yul salımı, kafe-restoran häm istälekle äyberlär satudan ğına aqça kerä. Ä tarixi mirasnı saqlaw belän munitsipalitetlar

şöğellänergä tieş dip belderde İspaniä wäkile. Qazan Başqarma komitetı citäkçese Marat Zahidullov:

Federal' qanun ozaq waqıt tarixi binalarnı xosusıylaştıruğa çikläwlär quydı. Xäzer nihayät boz quzğaldı kebek. Çönki barı şäxsi keşelärgä birep kenä ul binalarnı saqlap bula, mäsälän Qazandağı barlıq tarixi häykällärne tözekländerü öçen munitsipalitet aqçası citmäyäçäk.

Budapeşt şähäre başlığı Kabor Demski xäzer yaña tör turistlar barlıqqa kilde dip assızıqladı. Sovet zamanındağı turistlar barı qarap qına yörilär häm bernärsä dä satıp almıylar ide, xäzer alay tügel üzgärdelär dip söyläde. Kabor Demski:

Yılına Budapeştqa 2 million yarım turist kilä häm alarnı urtaça 6 kön uzdıra.

Ul berençe çiratta turistlarnı cälep itü öçen maxsus urınnar kiräklegen äytte. Budapeştta bu törek munçaları häm tönge muzeylar ikän. 16 ğasırdan birle saqlanğan munçalar inde Törkiäneñ üzendä dä yuq. Şul uq waqıtta Budapeşt şähäre başlığı turizm üsä başlaw şähärdäge tınıçlıqnı beterä dip bilgeläp uzdı, soñğı waqıtta törle waq-töyaq suğışular arttı şähärdä dip belderde.

Qazanda Budapeştqa qarağanda turistlar 2 tapqır azraq kilä älegä. Kiläçäktä isä Qazanda dini turizmnı üsterü küzdä totıla. Mäçetlär, çirkäwlärne kürsätü öçen küp qunaqlarnı cälep itü qarala.

Landış Xarrasova