Accessibility links

якшәмбе, 4 декабрь 2016, Казан вакыты 13:17

Tatar kongressınıñ Başqarma komitetında Başqortostan tatarları belän oçraşu uzdı


Soñğı waqıtta Bötendönya tatar kongressı şaqtıy aktiv eşli başladı. Düşämbe könne kongressnıñ 2002 yıldağı eşçänlege näticälärenä bağışlanğan cıyılış uzdı. Şuşı yomğaq cıyılışına Rusiä töbäkälärennän kilgän wäkillär, milli oyışmalarnıñ citäkçeläre Qazan mädäniät üzägendä ütkärelgän kiñäşmädä dä qatnaştılar. Anda 15 tän artıq töbäk wäkilläre üzlären qızıqsındırğan mäsälälär buyınça sorawlar birdelär, çığışlar yasadılar. Avgust ayında ütkän qorıltaydan soñ milli tormışta kilep tuğan mäsälälärne niçek xäl itärgä, yaqın arada nindi çaralar ütkärergä, süz şul turıda bardı. Rinat Zakirov alıp barğan kiñäşmädä Tatarstan wäkilläre bularaq Aydar Xälim häm Fäwziä Bäyrämova da çığış yasadı.

Töbäklärdän kilgän delegatsiälär arasında iñ zurısı Başqortostannan ide. Düşämbe könne ütkän yomğaq cıyılışında büläklänüçelär arasında da başqortostanlılar şaqtıy buldı. Kompozitor häm cämäğät eşleklese Alik Loqmanovqa Tatarstannıñ atqazanğan mädäniät xezmätkäre digän isem birü turındağı diplom, şulay uq ğälim Fail Safinğa Bötendönya tatar kongressınıñ ixtiramnämäse, başqa millättäşlärebezgä dä istälekle büläklär tapşırılğan ide. Sişämbe könne Bötendönya tatar kongressı Başqarma komitetında Başqortostan delegatsiäse belän maxsus oçraşuda Başqortostan tatarları öçen aktual' mäsälälär tikşerelde. Ayırım alğanda, Başqortostanda tatar mäğärifeneñ torışı turında obyektiv häm täfsille beleşmä buldıru, bu mäsäläne Başqortostan räsmi organnarı, mäğärif ministrlığı belän bergäläp utırış äzerläw kiräklege turında äytelde. Başqortostandağı tatar sıynıfları däresleklär belän niçek tä'min itelä, tatar mäktäpläre häm sıynıfları öçen Ufada çığarılğan däresleklärneñ eçtälege häm ideya yunäleşe, sıyfatları nixäldä, bu mäsäläne açıqlaw öçen ekspertlar cälep itü yulları, kiläçäktä Başqortostan tatarlarınıñ problemaların cämäğät oyışmaları, idärä organnarı belän bergäläp xäl itü mömkinlege oçraşuda menä şul turıda süz bardı. Tatarstan gäcit yäki jurnallarınıñ, televidenie, radiokompaniäläreneñ xäbärçelek punktları Başqortostannıñ qayber töbäklärendä açılu maqsatqa yaraşlı bulır ide digän fikerne här ike yaq ta xuplap qarşıladı. Çärşämbe könne isä Tatar kongressınıñ Başqarma komitetında çirattağı jurnalistlar belän oçraşu kiçäse uzdı. Anda bügenge köndä respublika öçen aktual' temalar tikşerelde.

XS
SM
MD
LG