Bügen Atlantik okeanı urtasındağı Azor utrawlarında Ğiraq tiräsendäge wazğiät turında söyläşer öçen Amerikan prezidentı Geroge Bush, Britaniä premyer-ministrı Tony Blair häm İspaniä xökümäte başlığı Jose Maria Aznar oçraşa. 3 il citäkçeläre Berläşkän Millätlär Oyışmasınıñ İminlek Şurasında Ğiraqqa qarşı köç qullanunı röxsät itkän rezolyutsiä qabul itü öçen küpçelek tawışlarnı cıyarğa tırışsa da, Şuranıñ ber genä äğzası-Bolğarstan bu täqdimgä xuplaw belderde. Oçraşuı aldınnan BBC xäbärçesenä Aznar, yaña rezoluytsiä säyäsi baqımnan kiräk, läkin qanuni yaqtan qarağanda –alay uq kiräk tä tügel, dide. Moña qadär qabul itelgän rezolyutsiälärne iskä alğanda, suğış başlarğa cirlek bar inde, dide Aznar.
Kiçä Amerikan prezidentı, Quşma Ştatlarnıñ Säddämne qoralsızlandırırğa xärbi köçe citärlek, dip belderde. Säddäm Hösäin üze qoralların yuq itüenä ömetlänep bulmıy. Ägär anı qoralsızlandırırğa köç qullanu kiräk bulsa, Amerikan xalqı belsen-bezneñ qorallı köçlär ciñügä ireşer öçen här närsä belän tä’min itelgän, dide Amerikan citäkçese.
Bağdadtan alınğan xäbärlärgä qarağanda Ğiraq bügen dä tıyılğan Al-Samoud raketaların yuq itüne däwam itte. Berläşkän Millätlär Oyışması inspektorları bu eşne küzätep tora.
