Accessibility links

якшәмбе, 11 декабрь 2016, Казан вакыты 03:26

Waşington yanında AQŞ prezidentı Bush häm Britaniä premyer-ministrı Blair oçraşa


Britaniä xärbiläre könyaq Ğiraqtağı Basra şähäre yanında 14 Ğiraq tankın yuq itüläre turında xäbär itte. Kiçä Bağdadqa bulğan xärbi hawa höcümnäre näticäsendä 36 keşe häläk bulğan häm 200dän artığı yaralanğan. Bu xaqta Ğiraq sälämätlek ministrlığı xäbär itte. Quşma Ştatları citäkçelegendäge bu xärbi kampaniäneñ ber atnası däwamında 350 keşe häläk bulğan häm 4 meñnän artığı yaralanğan. Pentagon birgän mäğlümatlärgä qarağanda, Ğiraq suğışında 24 amerikan xärbie häläk bulğan, 7se-Ğiraqlılırğa äsirlekkä eläkkän, 10 keşe xäbärsez yuğalğan dip isäplänä. Britan ğaskärläre arasında 20se häläk bulğan häm 2se xäbärsez yuğalğan. Uzğan töndä tönyaqtan höcüm äzerlär öçen Ğiraqnıñ kördlär kontrolendä bulğan tönyaq töbägenä meñgä yaqın amerikan desantçıları kitertelde. Könyaqta Bağdadqa taba yulda Amerikan häm Ğiraq köçläre arasında bäreleşlär däwam itä. Su yulı belän Umm Qasr portına kilep citergä tieşle humanitar yardäm 1 köngä soñğa qala. Şähär äle minalardançistartılıp betmägän, dip xäbär itelde. İnde mäğlüma bulğança, Britaniä köymäse Ğiraqqa 230 tonnağa yaqın aşamlıqlar, darular, yurğannar häm eçär su kiterä.

Britaniä premyer-ministrı Tony Blair Waşington yanındağı Camp David prezident utarında Amerikan citäkçese George Bush belän oçraştı. Blair süzlärençä, ike citäkçe Ğiraqtağı wazğiät, suğıştan soñğı Ğiraq häm NATO äğzaläreeneñ qayberläre, atap äytsäk, Fransiä belän suğıştan soñ mönäsäbätlärne caylaw yulları turında söyläşmäkçe ide. Bügen kiçen Britaniä premyer-ministrı häm Amerikan prezidentı berlektä matbuğat oçraşuı uzdırdı. Bu xaqta tulıraq mäğlümatne aldağı tapşırularıbızda tıñlarğa çaqırabız. Bush belän söyläşülär tämamlanğaç, Blair, New Yorkka, Berläşkän Millätlär Oyışması General Sekretare Kofi Annan belän oçraşuğa kitä. Londonda Xalıqara Strategik Öyrülär İnstitutında bügen Fransiäneñ Tışqı eşlär ministrı Dominique de Villepen, Säddäm xakimiäte kebek diktatura rejimına qarşı berençe bulıp höcüm yasaw –alğa taba dönyağa totrıqsızlıq alıp kilergä mömkin, dip belderde. Küpläp üterü qorallarğa qarşı köräş barı tik xalıqara cämäğätçelege belän berlektä barırğa mömkin, dip östäde Villepin.Qorallarnı cäyeldermäs öçen effektiv yullar ğına uylap tabıp bula. Ğiraqta başlağan eşne däwam itergä kiräk. Töbäktäge nizaqnı barlıq taraflarnıñ qatnaşında konstruktiv söyläşü belän genä çişep bula, dide Fransiäneñ tıqşı eşlär ministrı. Şulay uq Waşington belän mönäsäbätlärgä tuqtalıp, Villepin, Fransiä Amerika Quşma Ştatları belän aralarnı caylarğa teli, dide.

XS
SM
MD
LG