Accessibility links

дүшәмбе, 5 декабрь 2016, Казан вакыты 19:54

Amerikan xärbiläre protest çarasında qatnaşqan 7 Ğiraqlını atıp üterülären tanıdı


Amerikan ğaskärläre wäkile ofitser Alan King Bağdadta kiläse 2 atna eçendä yaña politsiä xezmäte eşli başlıyaçaq, dip belderde. Ğiraqnıñ tönyağındağı Mosul şähärendä, şahitlär häm tabiplar süzlärenä qarağanda, qaraqlar banknı talarğa tırışqanda 4 keşene atıp ütergän.Kiçä şul uq urında kimendä 10 keşe atıp üterelgän. Şahitlär, mäğlümat agentlıqlarına, amerikan xärbiläre protest çarasında qatnaşuçılarğa ut açtı, kimendä 10 keşe häläk buldı, dip belderde. Quşma Ştatlar ğaskärläre wäkile, general Vincent Brooks süzlärenä qarağanda, amerikan xärbiläre-üzlärenä atılğaç qına cawap itep ut açqan, 7 Ğiraqlı häläk bulğan, dip belderde. “Amerikan ğaskärläre häm maxsus köçlärenä ut açıldı. Protest çarasında qatnaşuçılarnıñ qayberläre qorılmağa menä başlağaç xärbilär dä cawap itep ut açtı. Älbättä, atuçılar-koalitsiä köçlärennän ide. Atışlar näticäsendä ber-niçä Ğiraq keşese häläk buldı” dide Brooks. Bügen Ğiraqtağı amerikan xärbi köçläre başlığı general Tommy Franks Bağdadqa kilde. Najaf şähärendä bügen xalıq Şiği dini mäktäpne yaqlap uramnarğa çıqtı. Bağdadta qulğa alınğan Fälestinne Azat İtü Frontı citäkçese Abu Abbasnı İtaliä üzenä tapşırunı teli. 1985nçe yılda İtalyan köymäsendäge yulçılarnı totıq itep alıp 1 amerikannı üterüdä ğayeplängän Abbas İtaliädä ğömerlek törmä cäzasına xökem itelgän. Fälestin ministrı Saeb Erekat Abbasnıñ irekkä çığarıluın taläp itte. Abbasnı totqında qaldıru-Yaqın Könçığış qısalarında qabul itelgän tınıçlıq kileşüen boza, dide Erekat. 23 yıl İranda yäşägän Ğiraq Şiği möselmannarınıñ yulbaşçısı Abdelaziz Hakim bügen tuğan ilenä qayttı. İran televideniäse, Kut şähäre xalqınıñ anı şatlıq belän qarşı aluın kürsätte. Hakim-Ğiraqta İslam Revolyutsiäse Yuğarı Şurasınıñ räise urınbasarı. Kiçä Nassiriya şähärendä uzğan Ğiraq citäkçeläreneñ cıyınında Yuğarı Şura protest belderep qatnaşmadı. Şura –Ğiraqnı tözekländerügä Quşma Ştatlarnıñ qatnaşuına qarşı çığa. Yuğarı Şuranıñ başlığı , şulay uq 23 yıl İranda yäşägän Ayatollah Mohammäd Baqır Hakim da Ğiraqqa qaytırğa qarar birgän dip xäbär itelä.

XS
SM
MD
LG