Berdäm Rusiädän Tatarstanda Dumağa kem saylanır?

Berdäm Rusiä dip atalğan yaña xakimiät firqäse Mäskäwdä şimbä könne köndezge säğät 1gä qädär eşläp, saylaw aldı programmasın häm kandidatlar isemlegen rasladı. Şuşı firqäneñ federal' isemlegeneñ iñ başında Boris Grızlov, Yuriy Lujkov, Sergey Şoygu häm Mintimer Şäymiev tora. Berençe 3 keşeneñ härqaysı Mäskäwdä yäşi häm federal' xakimiät strukturasına kerä. Dimäk, Tatarstan prezidentı Rusiäneñ barlıq töbäkläre häm millätläre isemennän şuşı firqäneñ citäkçe törkemendä bulaçaq. Härxäldä, 7nçe dekabergä qädär. Ä Dumağa saylawlar ütkäç, deputatlıq mandatın kesägä salıp, Oxotniçiy ryad uramındağı Duma binasına eşkä baruçılar arasında Grızlov ta, Lujkov ta, Şoygu da, xätta Mintimer Şäymiev tä bulmas kebek. Bu şäxeslär älege firqäneñ qiblasın, abruyın bilgelär öçen, anıñ tamğası bularaq isemlek başına quyılğannar.

Küplär öçen iñ qızığı – kiläçäk Dumada eşläp utıraçaq deputatlarnıñ isemlege. Federal', töbäk häm ber mandatlı okrug nämzätlär isemlege şimbä könne ük raslansa da, älege dokument düşämbe kiçenä qädär matbuğatta, radio-televideniedä kürenmäde. Başqa firqälärdän saylawda qatnaşırğa teläwçelär bulaçaq köndäşläreneñ isemnären belmilär. Barı tik ber genä delegat bezgä xälne añlata aldı. Berdäm Rusiä qorıltayında qatnaşuçı delegatlarnıñ berse – Aleksandr Stepan ulı Fedorov – Yäşel Üzän xakimiäte başlığı urınbasarı. 3 yıl elek ul Tatarstan prezidentın saylawında Mintimer Şäymievnıñ köndäşe sıyfatında qatnaşqan ide.

Vladimir Putinnıñ qorıltayda, min sezneñ firqä öçen 4 yıl elek tawış birüemä ükenmim digän ide. 4 yıl elek Yuriy Lujkov belän Mintimer Şäymiev citäklägän firqä öçen Putinnıñ tawış birüe ikele. Ul Yedinstvo öçen tawış birgän. Xäzergä şul bilgele. Oleg Morozov elekkeçä Qazan, Yäşel Üzän şähärläre buyınça tügel, ä Çallı okrugınnan çığa. Anıñ urınına bu okrugtan Tatfondbanknıñ direktorlar şurası räise Rinat Ğöbäydullin saylawğa çığaçaq. İdel buyı okrugınnan Sergey Şaşurinğa köndäş bulıp Qızıl Şärıq şirkäte xucası Ayrat Xäyrullin, Flürä Ziätdinova uzğan saylawlarda ciñep çıqqan Tübän Kama okrugınnan Al'bert Salixov, elek Fändäs Safiullin saylanğan Älmät okrugınnan Däwlät Sovetı räise urınbasarı Marat Mähdiev çığaçaq.

Firqäneñ töbäk isemlegendä kemnär raslanuı turında da räsmi xäbär älegä bulmadı. Färit Möxämmätşinnan tış isemlekkä Oleg Morozov, Mäskäw wäkile Aleksandr Kozlowskiy, Ayrat Xäyrullin, Änbär Karmiev, İldar Ğilmetdinov häm başqalar kergän. Xäzergä şunı ğına istä qaldırıyq. Berdäm Rusiä firqäse nämzätläre terkälgäç, Mintimer Şäymievkä häm Färit Möxämmätşinğa üz eş urınnarın qaldırıp, yalğa kitep torırğa turı kiläçäk.

Rimzil Wäli