Başqortstandağı saylaw aldı ğawğalarına Qazan häm Tatarstan cämäğätçelegeneñ reaksiäse turında. 7nçe dekaberdä tatarlar yäşi torğan rayonnarda – İleştä, Yañawılda, Dürtöyledä häm başqa töbäklärdä Räximovqa al'ternativ bulğan kandidat Ralif Safinnıñ ciñep çığuı yäki bik küp tawışlar cıyuı Tatarstanda da mäğlüm. Ufada, Bäläbäydä, Beloretskida häm başqa şähärlärdä Sergey Veremeyenkonı häm Ralif Safinnı yaqlawçılar tağın da kübräk ikän. Menä şuşı şartlarda, yäğni Mortaza Räximovnıñ säyäsätenä Başqortstan saylawçılarınıñ iñ kimendä 55% tiskäre bäyä birgändä, ikençe turda anıñ ciñügä forsatı zur bulmawı kürenep tordı. Uzğan atna axırında Mäskäwdän, Rusiä prezidentı administratsiäsennän wäkillär kilep, Putin isemennän Räximovnı yaqlaw, tatar telenä status birelergä mömkin dip yuatu Qazanda qarşılıqlı fikerlär uyattı. Tatar telenä status birü xaqına zakon çığaru initsiativası belän parlamentqa möräcäğät itärgä bulğan Mortaza Räximovqa ışanuçılar bik az. Çönki bügen ük, bernindi zakon üzgärtmästän dä Başqortstannıñ Könbatış rayonnarında, tatar awıllarında başlanğıç klass uquçılarına tuğan tel itep başqort telen kertüne ber köndä tuqtatıp bulır ide. Ğomumän, Başqortstanda millätlär tigezlegenä garantiä bireläme? Bötendönya tatar kongressınıñ qararları, tatar cämäğätçelegeneñ teläge Başqortstan xakimiätläre tarafınnan kiläçäktä dä inqär itelerme? Elek birelgän wäğdälärneñ, cäy köne çığarılğan mäğlüm Ukaznıñ ütäleşe turında da tulı mäğlümat yuq. Tatar kongressı citäkçese Rinat Zakirov berençe turda Könbatış Başqortstan rayonnarındağı tawış birü yomğaqların üzenä kürä milli referendum, dip atadı. Zur säyäsi uyınnar barğanda, tatar mänfäğätlären Başqortstan xakimiäte ber tapqır uynıy torğan kärt itep kenä qullanmasmı? Qazanda şundıy sorawlar tudı.
Rimzil Wäli
