Accessibility links

сишәмбе, 6 декабрь 2016, Казан вакыты 08:42

Räşit Wahapov - ul tatar estradasınıñ Säydäşevı


Räşit Wahapov icatına bağışlanğan fänni-konfrensiä cırçını iskä alu çaraları qısalarında ütä. Belgänegezçä, Räşit Wahapov isemendäge cır festivale ütkärelgän ide, mäşhür cırçınıñ icatına bağışlanğan kitap basılıp çıqtı, Tübän Novgorod ölkäsendä, häm Finländiädä istälekle çaralar ütkärelde. İnde 20 dekaberdä ütkärelgän konferensiä Fännär Akademiäseneñ tel, ädäbiät, sänğät institutında ütte. Ul Novgorod tatarlarınıñ «Yaqtaşlar» cämğiäte, «Tatarstan» jurnalı, fännär akademiäse häm tatar kongressı wäkilläre tırışlılığı belän ütkärelde.

Bu fänni cıyın «Räşit Wahapov häm tatar cır sänğäte» digän isem astında ütte. Anda törle-törle cämäğät keşeläre, cırçılar, ğalimnär çığış yasasa da, küpçelek çığışlarda, Räşit Wahapovnıñ yuğarı professional ostalığı häm şuşı ostalıqnıñ bügenge cırçılarğa citmäw kebek fikerlär yañğıradı. Mädäniät universitetı professorı Venera Ğanieva «Räşit Wahapovnıñ başqaru kul’turası üzençälege» turında söyläde, Pedagogiä universitetı möğällime Minğol Ğaliev Räşit Wahapovnıñ tatar cır mäktäbenä kertkän öleşe xaqında notıq uqıdı. Raşit Wahapov belän berençe tapqır sabıy çaqta oçraşqan cırçı Golzada Safiullina isätleklär belän büleşte. Şul uq waqıtta Gölzada, bügenge estrada yoldızlarına tänqit dä belderde. Bügenge tatar estradası cırçılarına häm alarnıñ icatın yaqtırtqan mäğlümat çaralarına tänqitle qaraş çığış yasağan başqa ğalimnär, cämäğät eşlekläreneñ notıqlarında da qabatlandı. Cırçınıñ icatın mäñğelläşterü yözennän küpmeder eş eşlänsä dä, Raşit Wahapov turında televizion film töşerelmägän, isemen yörtüçe mädäniät uçaqları, anıñ sını Qazan uramında tormıy, dip söyläde, şağir Rinat Xaris.

Konferensiädä yomğaqlaw süze belän Räşit Wahapov icatı nigezendä dissertatsiä yazğan, «Tatarstan» jurnalınıñ baş möxärrire bulğan Rifat Fättäxov çığış yasadı. Ul Räşit Wahapovnı, Tatar estradasın yuğarı professional däräcägä kütärgän şäxes, dip atadı häm anıñ şäxese istälegenä Qazanda häykäl quyu urınlı bulır ide, digän fiker belderde. Bu häm başqa täqdimnär konferensiäseneñ axırğı qararına kertelde.

Bikä Timerova.

XS
SM
MD
LG