Accessibility links

пәнҗешәмбе, 8 декабрь 2016, Казан вакыты 05:18

Ğiraqta ğadättäntış wazğiät 30 köngä ozaytıldı


Ğiraq premyer-ministrı İyad Allawi ildäge ğadättäntış wazğiätne tağın 30 köngä ozayttı. Berençe tapqır bu tärtip Fallucağa höcüm aldınnan noyaberdä 60 köngä kertelgän ide. Ğadättäntış wazğiät xökümät köçlärenä kommendant säğaten bilgeläw, çiklärne häm hawa alannarın yabu, terrorçılar belän bäyläneştä toruda şiklänelgän keşelärne qulğa alırğa wäkälätlär birä. Ğiraqnıñ üzendä köç qullanu kimemi. Çärşämbe könne kimendä 3 intixar höcüme buldı, 20dän artıq keşe hälak buldı. Tönyaqtağı Mosul şähäre yanında 18 ğiraqlınıñ mäyetläre tabılğan. Polisiä mäğlümatlärenä qarağanda, 14tän alıp 20 yäşlärendäge älege 18 keşe amerikan bazasına eş sorap kilgän bulğan. Alarnı başlarına atılğan, qulları bäylängän kileş tapqannar. Ammanda bügen Ğiraqta ay azağında ütäçäk saylawlar aldınnan iminlek mäs'äläse turında süz bardı. Ğiraqnıñ kürşe illäre tışqı eşlär ministrları oçraştı. İran tışqı eşlär ministrı Kamal Kharrazi, Jordan patşası Abdullanıñ süzlärenä qarşılıq yözennän cıyında qatnaşmıy. Abdulla küptän tügel, İran, 30 ğınwarda ütäçäk saylawlarnı Ğiraqta şiği möselman xakimiäte urnaştıru öçen faydalanırğa tırışaçaq, dip äytkän ide. İran oçraşuğa üzeneñ tübänräk däräcädäge wäkilen cibärde. Cıyında Jordan, Törkiä, Süriä, Söğüd Ğaräpstan häm Kuwait tışqı eşlär ministrları qatnaşqa. Bügen Jordan patşası Abdullah, anıñ süzläreneñ yalğış añlağan buluların belderde. Şiğilärgä qarşı ber süzem dä yuq, dide Abdullah. Ukraina saqlanu ministrı Oleksandr Kuzmuk bügen Ğiraqqa kilde. Bağdadtağı amerikan xärbi köçläre citäkçeläre belän bulaçaq oçraşuda köntärtibendä Ğiraqtağı ukrain ğaskärläreneñ ber öleşen qaytartu mäs'äläse tora. Şulay uq ministrlıq belderüendä, Kuzmuk Bağdadnıñ tönyağındağı Kut häm Az Suwayrah'dağı ukrain xärbi bazaların da barıp küräçäk, dielä. Ğiraqta 1650 ukrain xärbie bar. Ukraina saqlanu räsmiläre süzlärenä qarağanda, alarnıñ zur öleşe bıyıl öylärenä qaytarılaçaq. 9 ukrain ğaskärie bäreleşlärdä hälak buldı, 20gä yaqın keşe yaralandı.

XS
SM
MD
LG