Accessibility links

җомга, 9 декабрь 2016, Казан вакыты 12:48

Atlar bäyräm könendä dä çabıştı


Yaña at sportı kompleksında ütkän bäyräm, Qazan saban tuyın xäterlätte. At çabışları da buldı, köräş, biülär, häm awıl xucalığı xezmätçännärne büläkläw dä oyıştırıldı. Qatı yañğır da, bäyräm itärgä telägän qazanlılarnı qurqıtmadı. İske aeroport cirendä urnaşqan at sportı kompleksına maşinalar belän kilü yulları yabıq bulu säbäple, avtobus tuqtalışınnan baru yıraq bulğanğa kürä, at çabışları uza torğan bäyrämgä barıp citkänçe, qunaqlar, irtän işep yawa torğan yañğırda çılanırğa ölgerde. Açıq tribunalar ğadiräk keşelär öçen bulsa, pıyala artındağı zatlı urınnar bik qäderle qunaqlar öçen ide. At çabışları başlanır aldınnan, awıl igençelären xörmätläw çarası buldı. Yaña ikmäktän peşkän ipine Tatarstan prezidentına tapşıru buldı. Urıp-cıyu kampaniäse bıyıl bik uñışlı bara ikän, gektardan urtaça 30 tsentr ikmäk cıyıla, dielde tantanada. Ğädättägeçä, Norlat rayonı başqalarnı uzdırıp cibärgän, gektardan 50 tsentr cıyğan ikän. Norlat yurtaqları da başqa yaqlardan kilgän atlardan küpkä yaxşıraq ikän. Berniçä kön elek, Rusiä prezidentı bülägenä ütkän at çabışlarında Norlat at zavodı yurtağı ciñgän bulğan. Şuşı atnı tamaşaçılarğa kürsättelär häm üsterüçelären, qarawçıların büläklädelär. 30nçe avgusttağı at çabışları Tatarstan prezidentı, Däwlät şurası, Awıl xucalığı ministrlığı, Qazan şähär başlığı häm başqa taraf büläkläre quyıp ütkärelde.

At çabışlarında barlığı 150 at qatnaşqan. Alar arasında Norlattan ğına tügel, Piträç, Aqsubay häm Qazan at zavodı yurtaqları da buldı. Alardan tış, Başqortstan, Tübän Novgorod, Leningrad, Çiläbe ölkäläre çabışqıları da yarışta qatnaştı. Atqa aqça quyıp uynatu xezmäte, totalizator da, 30 avgust çabışlarında populär buldı. Rusiä prezidentı bülägenä bulğan 27nçe avgust yarışlarında kebek bulmasa da, atlarğa aqça quyu bardı. İñ kimendä 30 sum quyarğa kiräk ide, iñ zur summa – çiklänüsez ide. Tapşırunı efirğa äzerlägän minutlarda, totalizatorda otqan iñ zur summa bilgele tügel ide. Ämma 700 sumğa qädär otqan keşelär buldı, dip xäbär itelde. At çabışların qararğa kilgän qunaqlar arasında Tatar kongressı delegatları da bar ide. At çabışları ütä torğan mäydan yanında «Tatarstan, urtaq yortıbız» digän cigär astında tatar-başqort, urıs, mari, udmurt, qazax-qırğız häm başqa millät wäkilläreneñ yortları salınıp, awıl öye küreneşläre taswirlanğan. Böten tatar-xalqı öçen bäyrämdäge xalıqnı arça üzeşçännäre biette. Könneñ salqınça häm yañğırlı buluına qaramastan bäyräm tamaşalarında biüçelär küp buldı. Başqort xalqın çağıldıruçı qorılma – bay itep bizälgän tirmä ide, anda Tatarstan başqortlarına Mortaza Räximovnıñ büläge dip yazılğan ide. Ni säbäpleder, tirmä yanında keşe bulmadı, başqort xalqı mädäniäte belän tanıştıruçı tabılmadı.



Bikä Timerova.

XS
SM
MD
LG