Accessibility links

сишәмбе, 6 декабрь 2016, Казан вакыты 03:46

Läylä Kärimova: “Min ätiemne ğömer buyı köttem”


Üzeñ turında uylama, ileñ turında uyla - Fatix Kärimneñ deviz bulıp yañğırağan bu süzläre här tatarnıñ yörägendä yäşi häm bu süzlär böyek şağirneñ tormış qağidäse dä bulğan. Faciğäle yazmışlı tatar şağireneñ icatı buınnarnı totaştıra. Şağirneñ ikençe qızı Läylä xanım Kärimova zur teläk belän üsep kilüçe buınğa ätise xaqında bulğan iñ qäderle xatirälären citkerä. Çärşämbedä Böyek Watan suğışı memorial-muzeenda Läylä xanım Kärimova belän oçraşu buldı.

Muzeyda Läylä Kärimova belän oçraşuğa 12 gimnaziäneñ 6-7 sıynıf uquçıları kilgän ide. Mondıy oçraşularğa Läylä xanım bik teläp kilsä dä, bu oçraşular anıñ öçen ciñel genä ütmi, älbättä. Çönki yörägendä bulğan ärneş yañara. Küz yäşläre aşa ul Başqortstannıñ Bişbüläk rayonı Aеt awılında tuıp, keçkenädän mulla balası yarlığı tağılğan, ber ğäepsezgä dürt yıl buyı sörgennärdä cäberlängän, suğış tämamlanırğa öç aydan da azraq waqıt qaldı digändä ğömere özelgän ätise xaqında söyli. “Ätiemneñ yäşärgä, icat itärgä teläge, Ciñügä ışanıçı şulqädär zur ide, di Läylä xanım, şunlıqtan min anıñ üleme belän bik ozaq yıllar kileşä almadım”.

Üz ätisen Läylä xanım Kärimova bik keçkenä çağında ğına kürep qalğan. Şunlıqtan ul anı bik xäterlämi. Läkin Fatix Kärimneñ xatını Kädriä xanım qızları Ada häm Läylägä ätilären toyıp yäşärgä yärdäm itkän. Fatix Kärim xaqında Läylä xanımnıñ xatiräläre.

Keçkenä çaqta ätiemne töştä genä bulsa da kürergä xıyallandım. Bezgä äni anıñ turında härwaqıtta da söyläp tordı. Şayarıp, menä ätiegez qaytsa, barsın da söylim, dip äytä ide bez tıñlamağanda. Ätine bez toyıp yäşädek. Ul härwaqıtta da bezneñ yanda buldı. Äle dä. Min qayda ğına bulsam da, çit ilgä kitsäm dä, monda qalsam da, mäktäplärgä, törle oçraşularğa barsam dä ul minem yanda. Min anı sizäm.

Suğış tämamlanırğa bik az ğına qalğanda, xärbi burıçın ütägändä Fatix Kärim ülä. Qazanğa anıñ şinele, suğış utında yazılğan 100гән şiğerläre, poema-povest'ları qaytqan. Älege şinel' häm qulyazmalar Ciñüneñ 60 yıllığında açılğan Böyek Watan suğışı memorial-muzeenda saqlana. Fatix Kärimneñ üleme turında xäbär kilsä dä, qäbere anıñ ozaq yıllar bilgesez bula. Ul 12 yıldan soñ ğına, Könçığış Prussiä cirendä oçraqlı räweştä tabıla. Soñınnan anıñ qäbere Kaliningrad ölkäseneñ Bagrationovsk şähärenä küçerelä. Şul yıldan başlap Läylä Kärimova ulı Artem belän yıl sayın Ciñü bäyräme yaqınlaşqanda şul yaqlarğa, ätiseneñ qäber yanına aşqına. Pol'şa çigendä urnaşqan Bagrationovskiyda Fatix Kärim isemen bik qäderläp saqlıylar. Böyek şağir iseme belän atalğan uram, memorial' taqta, mäktäplärdä ütkärelgän Fatix Kärim uquları, anda anıñ icatı belän xätta ruslar da qızıqsınıp, şiğerlären rusçağa tärcemä itep öyränälär. Öç yıldan şağirneñ 100 yıllığı citä. Ä Tatarstanda häykällär quyu isemlegenä Fatix Kärim iseme kertelmägän dä.

Al'bina Zäynulla

XS
SM
MD
LG