►Nail İslamine iskä alalar
Bilgele ictimağıy häm dini xäräkät wäkile Nail İslami ülemeneñ cidençe köne uzıp barğanda “Apanay” mäçete tarafınnan iskä alına.
İslami üzen “bolğar möselmanı” dip atağan. Ul tarixi Bolğar tıyulığında yäki Bolğar-Spas rayonında milli häm dini mäxällä yäki ber kommuna tözü turında xıyallandı. Yıl sayın Borınğı Bolğar cirenä Qazannan baru eşlären oyıştıruda başlap yörde häm 2007 yılda qazanlı zıyalılarnı tuplap Bilärgä dä alıp barıp qayttı.
Ä “Möslimä” xatın-qızlar oyışması räise Älmirä Ädiätullina isä Nail İslaminı “üzençälekle fikerle keşe ide” dip iskä ala. “Anı añlawçılar az ide. Tik ul bik samimi, zatlı şäxes, märxämätle keşe ide”, - di ul. Ädiätllina İslamineñ Qazan çitendäge Petrovskiy bistäsendä yäşäwen dä äytä.
Ä tatartelle uquçılarğa Nail İslami tuğan telebezne, anıñ tämen añlatuçı kitaplar autorı bularaq ta bilgele bulğan. "Tämle-tatlı tuğan telem" kitabın Nail İslami isä ber ük awazdan başlanğan şiğerlärennän tuplağan bulğan. Şunıñ belän ul balalar häm telne yaratuçılarnı qızıqtıra aluçı mawıqtırğıç ısullar uylap tabuçı mäğrifätçe dä bulğan. Bu ğap-ğädi, arzanlı qäğäzdä basılğan kitabı anıñ tatar teleneñ bügenge yazmışı awır bulsa da, bay buluın kürsätergä teläwe bulğan. Nail İslami şulay uq TİÜ, tatar kongressı, möftiät belän dä tığız elemtädä torğan.
--------------------------------------------------------------------------------------------
►Medvedev ta fatir wäğdä itä
Rusiä prezidentı wazıyfalarına kereşkän Dmitriy Medvedevnıñ berençe ukazı Watan suğışı veterannarın 2010 yılğa qädär fatir belän täemin itü turında buldı.
Moñarçı Rusiäneñ här töbäge veterannarnı fatir belän täemin ittek dip, Mäskäwgä raport birgän ide. Xäzer mäsäläneñ xäl itelmäwe açıqlana.
Fatir mäsäläsen SSSR da çişmäde, Rusiä türäläre dä älegäçä xäl itä almıy. Döres, wäğdälär küp buldı. Öçençe prezident Medvedev üzeneñ berençe uqazın yañadan Rusiädäge şuşı ğömerlek problemağa bağışladı- 2010 yılda Watan suğışı veterannarınıñ barsıda fatirlı bulaçaq, dide. Moña qädär törle töbäklär Mäskäw qarşında xisap totqannar ide inde. Mäsälän, 1995 yılda Çallı xäkime R. Altınbayıv Çallıdağı veterannarnıñ barısı da fatirlı buldı, dip belderde. Tatarstan prezidentı M. Şäymiev üz näwbätendä respublikada fatirsız veterannar yuq, dide. Başqa region başlıqları da veterannar öçen fatir problemasınıñ tormışqa aşuın äytte. Menä tağın yaña prezident tormışqa aşqan mäsäläne xäl itü öçen yaña ukaz çığara.
--------------------------------------------------------------------------------------------
►Kaşapovnı çittän kilep yaqlıylar
“Çuqındıruğa- yuq” digän yazma taratqan öçen Çallı TİÜe räise Räfis Kaşapovqa cinayät eşe açıldı.
Ul millätara, dinara nizağ tudıruda ğäyeplänä. Xäzer anı prokuratura soraw aluğa daimi çaqıra. Moña qädär Kaşapovqa prokuratura üz advokatın täqdim itkän. Kaşapov annan baş tarta. Aña xoquqıy yaqtan yärdämne berniçä oyışma, advokat täqdim itä.
Tağın ber wäzğeyätne assızıqlaw kiräk. Çallınıñ berençe bala tudıru yortında çuqındıru yolası turında xäbär taralğan, 3 aydan soñ anıñ baş tabíbı Sergey Gnusaryov eşennän alına. Anıñ urınına Çallı sälamätlek saqlaw idaräse başlığı Azat Fätxetdinov quyıla. Mondıy alışınu bezneñ piketlar, xatlar yazu näticäse, dip sanıy R. Kaşapov.
--------------------------------------------------------------------------------------------
►TNV kanalı tik 36 gradusta ğına buşlay kürsätä
Uzğan tapşıruıbıznıñ bersendä Dürtöyledä yäşäwçe millättäşlärebezneñ “Tatarstan Yaña ğasır” kanalın qarıy almawları turında xäbär itkän idek. Mondıy problema Mäskäwlelärdä dä bar ikän. Ämma mäsäläneñ eçenä kergän sayın, problemalar kübäyä genä. Çönki“Tatarstan Yaña ğasır” kanalınıñ tapşıruları “buşlay kürsätelä, kanal här keşegä açıq” buluı turında mäğlümat yañğırağan ide. Ämma anıñ buşlay buluınnan ğädi televizor qarawçılar faydalana almıylar ikän şul. Monıñ belän tik reklam birüçelär faydalana ikän. TNV kanalınıñ signalların kabelle televidenie operatorları totıp alalar häm xalıqqa satalar ikän.
“Tatarstan yaña ğasır” kanalın, bigräk tä anıñ tatarça tapşıruların qararğa teläwçelär törle töbäklärdä şaqtıy. Ämma anı qarıy alu şartları uñaylanırmı, yaxşırırmı, yuqmı, ansın waqıt kürsäter.
--------------------------------------------------------------------------------------------