Башкортстанда беренче тапкыр татар сынчылары арасында агач сыннар фестивале узды. Чара Туймазы районы Төмәнәк авылы янындагы "Бабай утары" тарихи-мәдәни музей комплексында үтте. Биш көн дәвамында ачык һавада сынчылар милли темага сыннар иҗат итте. Фестивальдә 12 төбәктән килгән 19 сынчы катнашты. Күпчелеге Башкортстаннан иде.
БУ ТЕМАГА: Башкортстанда "Бабай утары" музей комплексы ачылдыБәяләү төркемендә Башкортстан һәм Татарстан белгечләре эшләде. Ярышның төп максаты — татар халык әкиятләре персонажларын тасвирлау, аларга җәмәгатьчелекнең игътибарын җәлеп итү.
Сынчы Былтырны коя
Чараның төп оештыручысы Русия татар авыллары ассоциациясе рәисе Фәнир Галимов сүзләренә караганда, фестиваль бик кызыклы һәм мавыктыргыч булган. Сынчылар ярыша-ярыша татар әкиятләре геройларын иҗат иткән.
— Чараны балаларга, яшьләргә халык авыз иҗатын тапшыру, әкиятләргә, риваятьләргә, легендаларга кызыксыну уяту максатыннан оештырдык. Чөнки безнең Милли үзәктә балалар бик кызыксыну күрсәтә, алар ул персонажларны үз күзләре белән күрсен дидек. Бу безнең мирасны киләчәк буынга тапшыру өчен эшләнде, — ди Фәнир әфәнде.
Әкият шулай туа
Фәнир Галимов сүзләренчә, чарада барлыгы 19 сынчы эшләгән, алар 15шәр сәгать буе туктамый иҗат иткән. Бер-берсе белән аралашып, дуслашып, тәҗрибә җыеп кайтып киткәннәр.
Бүрәнәдән Су анасы
Шунысы да куанычлы — сынчылар арасында урыс, чуаш, мари һәм башкортлар да булган. Аларның эшләре "Бабай утары"нда куелачак. Сынчылар сыннарны үзләре урнаштырырга өлгермәсә дә, урыннарын күрсәтеп, теләкләрен әйтеп калдырган.
Эш барышы
Сыннар тарихи-мәдәни музейда үз урыннарын табачак, мәсәлән, Су анасы су буена төшеп утырачак, агачлар арасына Шүрәле кереп посачак.
Сынчы Ефрем Калимьяновның Тал астында Су анасы сыны
— Инде миңа Кировтан, Ижаудан да үзләрендә шундый чара уздыруны сорап мөрәҗәгать иттеләр. Без агач сыннар фестивален ел саен төрле төбәктә уздыру мәсьәләсен өйрәнәчәкбез, — диде Фәнир Галимов.
Фәнир җиңүчеләрне бүләкли
БУ ТЕМАГА: Милләтнең бер кешесе: Фәнир ГалимовФестивальдә җиңүчеләрне билгеләүдә авырлыклар да булган. Бәяләү төркеме әгъзасы Рүзил Имамов сүзләренә караганда, яхшы һәм бертөрле эшләр күп булу сәбәпле һәр урын икегә бүленгән.
Шүрәле сыны
Шулай итеп, ике беренче, ике икенче, ике өченче урыннар билгеләнгән. Шуңа өстәп "Тамашачылар сөюе" дигән номинация дә ике кешегә бүлеп бирелгән.
Беренче урын алган Марсель Шәймөхәммәтов Былтыр һәм Шүрәле сыны янында
Беренче урынны Туймазы районының Серафимовка касабасыннан Марсель Шәймөхәммәтов белән Архангел районыннан Илнар Ахунгәрәев алган.
Беренче урынны алган Илнар Ахунгәрәев Егет һәм Аккош сынын эшләде
Рузил Имамов сүзләренә караганда, чара сынлы сәнгать өлкәсендә сәләтле иҗатчыларның әле дә бетмәвен, аларның милли зәвыкларының югарылыгын күрсәткән.
Чарада катнашучы сынчылар һәм бәяләү төркеме
🛑 Әгәр сезнең провайдер безнең сайтны томалап куйса, аптырамагыз, телефон йә планшетыгызга Азатлыкның RFE/RL әсбабын йөкләгез (App Store һәм Google Play кибетләрендә бушлай) һәм татар телен сайлагыз. Без анда да ничек бар, шулай!
🌐 Шулай ук, безнең Telegram каналына кушылырга онытмагыз!