Бөтентатар иҗтимагый үзәге (БТИҮ) Русиянең Украинадагы баскын сугышы турында документаль фильнары өчен Кинематографистлар төркемен Тукай бүләгенә тәкъдим итү татар халкын мыскыл итү дип саный.
"Татарстан рәисе каршындагы Татарстан дәүләт премияләре буенча комиссия утырышында 2026 елга Тукай бүләгенә нәмзәтләр билгеләнде. Бу исемлектә бер бик сәер нәмзәт бар: "Кинематографистлар төркеме: махсус хәрби операция турында документаль фильмнар циклы өчен."
Җәмәгать, бишенче ел инде Русия дәүләте бәйсез Украинага каршы басып алучы, җинаятчел сугыш алып бара. Әлеге канлы сугышта Татарстаннан һәм Башкортстаннан 17663 кеше һәлак булган. Бу рәсми расланган мәгълүмат. Чынлыкта үлгән, хәбәрсез югалган һәм авыр яраланган кешеләр саны берничә тапкыр күбрәк. Бөтентатар иҗтимагый үзәге бу гамәлне татарларга, башкортларга һәм башка халыкларга каршы геноцид дип бәяли. Кызганычка каршы, бу коточкыч геноцид көчәя. Русия хакимияте Украинадагы канлы сугышны дәвам итә.
Бөек Тукай гомер буе татар халкы өчен җан атып яшәгән, аның ачы язмышы турында борчылган.
Без сугышта юлбарыстан көчлебез,
Без тынычта аттан артык эшлибез.
Шул халыкныңмы хокукка хаккы юк? –
Хакъкыбыз уртак ватанда шактый ук! дип язган ул.
Белмәгән шул Tукай ХХ гасырның татарлар өчен геноцид һәм этноцид гасыры булачагын", диелә БТИҮ рәисе белдерүендә.
Шунда ук ничек Тукай бүләген җинаятчел сугышка багышланган фильмнарга биреп була? дигән сорау куя белдерүне чыгаручы Фәрит Зәкиев.
"Бөтентатар иҗтимагый үзәге бу кинемотографистларны нәмзәтләр исеменә кертүне Тукаебызны, татар халкын мыскыл итү дип бәяли. Бу нәмзәтне тәкъдим итеп, Габдулла Тукай исемендәге Дәүләт премиясе комиссиясе Тукайга хыянәт итте. Оят бу, хурлык! Татарларны бөтен дөньяга сатлык җан, милли горурлыгы булмаган мескен халык итеп күрсәтү!
1939 елгы җанисәптә Советлар берлегендә 4 миллион 300 мең татар булган. 2021нче елдагы җанисәпкә күрә Русиядә 5 миллион 300 татар яши, шуларның 3 миллионы татарча белми. Ә үзбәкләр 1939 елда 4 миллион 800 мең булганнар, 2021 елда алар 30 миллионлы, үзенең дәүләте булган зур милләткә әверелделәр, чөнки алар Русия империясеннән котылдылар. Ә татарларга бүгенге Русиядә бер генә хокук калган - җинаятчел сугышта Русия империясе өчен чебен кебек кырылу", диелә белдерүдә
2026 елда Тукай бүләгенә 13 намзәт дәгъва итә. Алар арасында : "Кормильцы", "Голоса из колыбели", "Дорога", "Казань – Лисичанск" махсус хәрби операция турындагы фильмнар циклы өчен кинематографистлар төркеме дә бар. Әлеге төркемгә Барыкин А.А., Суров О.Г., Кашинский Е.И., Емельянов Д.В. керә.
🛑 Русиядә Азатлык Радиосы сайты томаланды, нишләргә? Безнең кулланма.
🌐 Безнең Telegram каналына да кушылырга онытмагыз!