Bik säyer yıl dip atadı anı “Molodej' Tatarstana” gäzite. Yıl başında uramnarğa pensionerlar çıqsa, yılnıñ axırında inde aqça alıp aldanğan şikär çire belän awıruçılar respublika uramnarına ağıldı. Böyek ideya öçen sälämätleklären yuğaltqan xärbi pensionerlar xätta gospital'dä däwalanudan da mäxrüm qaldı. Tik şulay da keşe yöräge bit ömetlänä, haman da yaxşığa ışana. Mäğärif, sälämätlek, awıl xucalığı, toraq reformaların xalıq xakimiättän iñ zur büläk bularaq qabul itte. Nihayät tabiplar, ğalimnär dä layıqlı xezmät xaqın alır, uqıtuçılarnıñ tormışları berniqädär ciñeläyer häm bulaçaq änilärneñ dä balanı normal' räweştä tabu öçen aqça mäs’äläse xäl iteler digän ömet tudı.
Yıl waqiğası - Qazannıñ zur yubiley turında gäzit bolay yazdı. Meñellıq küpmegä töşte bit! Monı inde xäzer ber kem dä sanap beterä almıy. Şulay da ğorurlanırğa urın bar. Böten il Qazan turında öçençe başqala bularaq söyli başladı. Älegä xalıqnıñ metroğa ekskursiä öçen genä baruı qurqınıç tügel, eşneñ başı bar ikän, axırı da bulır, ägär bulmasa, cawap ta tatırğa turı kiläçäk bit dip yaza şul gäzit.
Molodejka ğädättägeçä, narkomaniä afätenä zur iğtibar birgän. Narkomaniä belän köräşü federal' idäräseneñ Tatarstan bülege belgeçläre respublika tönge klublarında çirattağı reydlar uzdırğan. “Arena” häm “Komunna” klublarına kilüçe 17-23 yäştägelärneñ 60%tı narkotik qullana bulıp çıqtı.
“Tatarstan yäşläre”neñ bäyräm sanında yıl yomğaqları ällä ni kürenmäde. Nigezdä yaña yılnı kem, qayda, niçek ütkärä, nindi büläk ala kebek mäs’älälärgä iğtibar birelä. Şulay da qızıqlı, aktual' yazmalar da oçrıy. Mäsälän, Tatarstan yäşläre jurnalistı Firdüs Gıymaltdinovnıñ cir reformasın tikşerügä bağışlanğan İminlek Şurası utırışı turında yazması. Cir yazmışın xäl itüçelär bik qızu bäxäsläşte häm duslarça taralıştı. Kreml'dä ütäse çirattağı “munçağa” qädär. Gäzittä şulay uq xalıqnıñ xatları - ay-zarları da küp basılğan. Anda poçta xezmätkärläre subsidiäsez qaldırğan äbi-babaylarnıñ küz yäşe dä, xezmät xaqı, yun'le pensiä kürmägän xalıqnıñ zarlanuları da bar.
Belmim, närsä bulıp betär, nilär kürsäter yaña ayaqqa basqan et yılı. Änä bit äle respublikanıñ sotsial' yaqlaw ministrı Klavdiä Novikova da üz qotlawında yaña yıl sotsial' ölkägä yaña sınawlar kiteräçäk di. Deputat İrina Terent'yeva isä 2006 yıl bigräk tä sotsial' ölkädä yaxşı näticälär kürsäter dip sanıy. Milli proyektlar xalıqnıñ tormışın ciñeläyter di ul. Bu proyektlar niqädär ixlas bulır xäzergä berkem dä belmi. Monı tormış üze genä kürsäter.
Al'bina Zäynulla