Rusiäneñ federatsiä Şurasında Qazanda tuıp – üskän, monda uq universitet betergän, partiä taralğan waqıtta KPSSnıñ Tatarstan ölkä komitetında eşlär idäräçese bulğan. Xäzer Qazan militsiäse daimi räweştä anıñ belän oçraşırğa teläp, köne – töne Mäskäwdä yatalar. Ämma Federatsiä Şurasında Kalmıkiyä respublikası wäkile bulıp eşläwçe Röstäm İsxaqov yuğarı palatada mäxkämä häm xoquq mäs’äläläre komitetında utıra. Anı cawapqa tarttıru öçen cay tabılmıy.
Röstäm Eduard ulı İsxaqov Qazanda belüçelär bik küp bulmasalar da , ul qulğa töşergän häm idärä itkän oyışmalar härwaqıt küz aldında.“Silena” aksionerlar cämğiäte, “İldar - tabaq” tämäke fabrikası, “Tatintreyd” finans häm milek kompaniäse häm “Aerostan” aviokampanyase. Soñğısınıñ iseme berniçä yıl elek böten dönyağa yañğırağan ide.
Xäteregezdä bulsa, Avganstanga xärbi cihazlar häm patronnar taşığan waqıtta taliplar qulına eläkkän İl -76 oçqıçınıñ Kandağarda totqınlıqta yatuı. Bu oçqıçnıñ ekipajı Vladimir Şarpatov citäkçelegendä Kandağardan qaçıp, Mäskäwgä, annarı Qazanğa qayttı. Bu batırlıq öçen qıyu yegetlärgä qaharman isemnäre, ordennarı birelde. Ä töp qaharman şuşı transport oçqıçınıñ xucası häm anıñ nindider dairälär öçen xärbi yök tasıp zur aqçalar eşläwe küplär öçen ser bulıp qaldı.
Qazanda Tatarstan häm Tuqay uramnarınıñ kiseşkän çatında öç qatlı tıynaq qına yortnıñ işegenä “Aerostan” şirkäte dip yazılğan ide. Şuşı ofista utıruçı Röstäm İsxaqov nindi aqçağa zur – zur oçqıçlar satıp aluı, xärbi konflikt barğan mäydannar aşa oçıp baru, dini fanatiklar tarafınnan qulğa alınğaç isän qalıp, soñraq imin kileş öygä qaytu tarixları iskitärlek. Şuşı xalıqara däräcädäge qawğa kiterep çığarğan oçışnıñ tamırların ezläp toruçı bulmadı. Xäyer, Röstäm İsxaqovnıñ eşquarlıq yulı ğädäti keşelär qazınıp qına belä torğan närsä tügel. “İzvestie Tatarstana” isemle möstäkıyl' gäzitneñ yaña 2006 yılda çıqqan 1-2 sanında İğor Korol'kovnıñ “Proxindiada Rustema İsxakova” digän mäqäläsendä bu xällärgä açıqlıq kertüçe faktlar kiterelä.
Rusiäneñ yuğarı parlamentında senatov bulıp utıruçı Röstäm İsxaqov monnan 11 yıl elek Qazannıñ üzägendä Mäskäw bazarı yanında toruçı matur binağa küz salğan. Zamança ayaq kiemnären çığaruçı bu yortnı Röstäm İsxaqov citäklägän “Tatintreyd” şirkäte 4,8 million sumğa satıp alğan. Ä binanıñ üz bäyäse 15 million bulğan. Niçek itep sänäğät häm milek belän idärä itü buyınça Respublika komitetı moña röxsät birgän? Röstäm İsxaqov citäklägän “Timerxan” firmasına “İldar - Tabaqqa” 6 million sumlıq sklad tözep birergä tieş bulğan. Ä bu sklad çınlıqta käğäzdä genä qala. Şulay itep, barmaq ta selketmiçä tämäke fabrikası Röstäm İsxaqov qaramağına küçä. “İzvestie Tatarstana” gäzitendä şul uq İsxaqov citäkçelegendäge “MiS Treyd” “Tatoptprodtorg” berläşmäsen binaları, avtomobil'läre belän bergä yotıp cibärep, däwlätne 22 million sumğa çişenderä. 2 yıldan soñ “Tatoptprodtorg” baylıqları “İdeal”, annarı “Snejnıy Bars” kompaniälärenä birelä. Bu şirkätlärneñ barısınıñ da xucası ber ük keşe - Röstäm İsxaqov. 1995 yılda şul uq Röstäm İsxaqov “Selena” şirkäte Qazannıñ “Balalar dönyası” univermagına 6 million investitsiä kertergä wäğdä itä, läkin bu aqça 2 yıldan soñ ğına birelä. Ä “Balalar dönyası” univermagı Röstäm İsxaqovnıñ “Tataintreyd” şirkätenä univermag tübäsendä urnaştırılğan televizion qorılma öçen 4 million aqça küçerä. Bu aqçalar “Selena”ğa kitä. Ä televizion cihazları quyılmıy. “İzvestie Tatarstana” gäzite bu turıda inde yartı yıl eçendä inde ikençe tapqır çığış yasıy, ämma bernindi näticä yuq.
Äytelgän kompaniälärneñ idärä ofisı Mäskäwdä Nikitski tıqrığında urnaşqan. Bu finans piramidasınıñ iñ yuğarı idärä ştabı häm anıñ başlı Röstäm İsxaqov belän xoquq saqlaw orğannarı, tikşerüçelär küpme genä oçraşırğa teläsälär dä, bu alarğa nasıyp bulmıy. Şuşı şikle eşlärne ütkärgän qayber şäxeslär üzläre dä qaçıp yuğalğan. Alarnıñ qayberläre tikşerüçelär binanıñ alğı işegennän kergändä, tegelär artqı qapqadan çığıp tayalar. Militsiä xezmätkärläre härwaqıt ğaciz bulıp yalğız torıp qalalar, çönki alarnıñ senatorğa teşe ütmi.
Xäzer inde Qazanda ğına da senator İsxaqov qatnaşqan ğämällär buyınça 5 cinayät eşe quzğatılğan. Ämma alarnıñ berseneñ dä däwamı, näticäse yuq. Niçek itep menä şundıy yuğarı däräcäne, senator wäkälätlären qulğa töşerep bula dip baş watuçılar bar. Älege gäzit deputatlarnı Federatsiä Şurasına saylap quyu tuqtatılğannan, senator däräcäse 4 meñnän başlap 3 million dollar bäyägä satıla dip iğlan itä. Tatarstan säwdägäre niçek itep Kalmıkiyä Prezidentı belän urtaq tel tapqan dip baş wata jurnalist Korol'kov.
Şunısı qızıq, gäzit mondıy xikmätle sorawlarnı häm şaqqattırğıç faş itülärne bassa da, aña berkem dä qarşı töşmi, mäxkämägä birmi, ä kiresençä mileklären tartıp alınğan aksionerlar senator İsxaqovnı ezläp, aña mäxkämä eşe quzğatırğa yörilär. Ämma xäzergä alarnı tıñlawçı kürenmi. Çönki cawap birergä tieşle keşe Federal' cıyılışnıñ yuğarı palatasında Rusiägä qanunnar yaza.
Röstäm Eduard ulı İsxaqovnıñ zur – zur binalarnı, şirkätlärne qulğa töşergändä, däwlät milke belän kemnär idärä itkän häm aña kemnär fatixa birgän ikänlege turında, xätta sorap toruçı da yuq.
Gölnaz Şäyxetdin