Köräşneñ kürke - ğädellektä, xärämläşmäwdä. 18 iyündä ütkän Çallı sabantuyında älege qağidä, töp şart berqädär bozıldı, häm xalıq arasında dulqınlanu tudırdı. Şuşı uq xalıq yärdäme belän döreslek torğızılmadı da. Bilgele bulğança, Çallı sabantuyı zur - zur büläkläre belän başqalarınnan ayırılıp tora. Menä bıyıl da, tatar-başqort köräşe buyınça baş batırğa 10 nçı model'le WAZ avtomaşinası, başqa awırlıq ülçäwlärendä ciñüçelärgä 3 OKA avtomobile, at çabışında berençelekne aluçığa da OKA quyılğan ide. At çabışında berençelekne Kavkazdan, Pyätiğorsk şähärennän kiterelgän "Etiket" quşamatlı at aldı. Şulay itep, yarışlarnıñ bu törenä bilgelängän büläk - maşina, Qaf tawları artına kitep bardı. Şunısı da mäğlüm, Sabantuylarına çittän kilgän köçle köndäşlärne bik yaratıp betermilär, yäğni, qimmätle büläklärneñ çitkä kitüe oşap betmi. Bıyılğı Çallı sabantuyı bu küreneşne tağın ber qat rasladı. Äytkänemçä, büläklär zurdan, köräşçelär dä törle yaqlardan kilä. Kilgännär arasınnan Balıq Bistäse rayonında tuıp üskän, xäzer Qazanda yäşäwçe İlnar Äxmätcanov köç-quäte belän başqalardan ayırılıp tora ide häm ul iñ populyar bulğan 85 kilogramm awırlıqta bil alıştı. Köräşüeneñ berençe minutlarınnan uq İlnar üzeneñ sälätle ikänen kürsätte, berençe yarışlarda köndäşlären matur itep arqalarına salıp, kiçke sabantuyında başqa batır iseme alu xoquqın da yawladı .Menä Mäydanda Çallıdan Aydar Näcmetdinov belän Qazannan İlnar Äxmätcanov. 40 minutlıq bil alışuda ciñüçe açıqlanmıy. Qazıylar, xalıq fikerençä ciñüçene bilgeläw öçen nindider säyer täqdim yasıylar, yäğni, sölgene hawağa çöyalär dä, köräşçelärneñ qaysı şunı berençe bulıp totıp ala, şul ciñüçe bula. Köräşçelär üzläre dä, xalıq ta monıñ belän rizalaşmıy. Xalıq yarsıy - yarsıy köräş taläp itä. Tağın bil alışu başlana. Sanawlı minutlar eçendä Qazan yegete oçkolar buyınça ciñelä. Mäydan, İlnar Äxmätcanovqa basım buldı diep, köräşne däwam itüne sorıy. Läkin Çallı qazıyları monıñ belän riza tügel, Kelämgä buş şeşälär, baş kiemnäre oça, Meñlägän xalıq urınnarınnan qubıp Mäydan urtasına ağıla, tiz arada çaqırtılğan maxsus militsiä otryadları belän beraz qul suğışları bulıp ala. Şulay da xalıq tınıçlana, şuşı uq bil alışu däwam itä. Näticädä 85 kilogramm awırlıqta Qazannan İlnar Äxmätcanov berençe qala. Azatlıq radiosına, köräş canatarları Nasıybulla Äüxädiev, Ğamil Fäyzraxmanov h.b - tatarça köräştä ğadellek bulırğa tieş, köräş barışında yaña qağidälär uylap çığarılırğa tieş tügel, alar bar inde, - didelär, häm Äxmätcanovnıñ xaqlı ciñüçe buluınnan qänäğätlek xisläre aluların äyttelär. Äye, bu könne, Çallı qazıyları yaxşı sabaq aldı şikelle - üzeñneken yaqlama, köräşkä ğädel bäyä bir". Sabantuynıñ şuşı mizgelläre baş batır iseme öçen bulğan bäygeneñ dä qimmäten berqädär töşerde. Baş batır - Ayrat Ğilaev. Ul - tatar - başqort köräşe buyınça atqazanğan sport masterı häm bilbaw köräşendä dönya çempionı.
Çallı, Ğafiulla Ğaziz
