Ozaqqa suzılğan yaña yıl bäyrämnäre dä ütep kitte. Berniqädär tınıp torğan ictimaği oyışmalar da eşçänleklären yañartıp cibärdelär. Mäğlüm ki, üz eşlärennän tış oyışmalar ölkä häm şähär xakimiätläre tarafınnan oyıştırılğan çaralarğa da cälep itelälär. Andıy çaralarnıñ berniçäse ğinwar ayında inde bulıp uzdı. Şuşı könnärdä genä citdi häm tantanalı räweştä gubernator bilgelägän ölkä grantı sertifikatların tapşıru bulıp uzdı. Annan soñ “Omskaya initsiativa” dip isemlängän ictimaği xäräkätneñ forumı ütte, “Watanım seber” xäyriä fondınıñ xisap cıyılışı uzdı,, sotsial'' yärdäm kürsätü üzäklärendä, balalar yortlarında çığışlar yasaldı häm başqa törle çaralar oyıştırıldı. Çaralarnıñ qayberlärendä milli mädäni möxtäriätlär citäkçeläre, şul isäptän tatar möxtäriäte aktivistları da qatnaştı.
Çaralarnıñ qayberlärenä ayırım tuqtalğanda, gubernator grantına tatar şähär milli mädäni möxtäriäte dä däğwa itte. Uzğan yılnıñ noyäberendä ike programma buyınça grantlar yazıp, komissiägä tapşırılğan ide. Qızğanıçqa qarşı, proyektlarnıñ berse dä komissiäneñ yaqlawın tapmadı, möxtäriät grant onıtmadı . Şulay itep, başqa grantlar konkursları oyıştırılmağan oçraqta, ağımdağı yılda tatar şähär milli mädäni möxtäriätenä barı tik üz köçenä, yäki ximayäçelär yärdämenä tayanıp qına eş alıp barırğa turı kiläçäk.
“Omskaya initsiativa” ictimaği berläşmäseneñ forumına kilgändä, bu xäräkät uzğan yılnıñ noyäberendä barlıqqa kilep, 34 tän artıq ictimaği oyışmanı tupladı. Berläşmä üzeneñ töp maqsatı itep ğadi xalıqnıñ tormışın uñay yaqqa üzgärtüne quya. 2 ay däwamında anıñ aktivistları xalıqnıñ ixtiäcın öyränü buyınça eş alıp bardılar. Soñınnan cıyılğan mäglümatlärgä tayanıp, berläşmäneñ programması tözelde. Düşämbe könne älege programmanı xalıqqa citkerü maqsatı belän “Omskaya initsiativa” tarafdarlarınıñ forumı ütte. Äytergä kiräk, bu berläşmä ictimaği oyışma dip sanala. Ämma anıñ eşläw räweşe, tiz arada küp kenä cıyınnar ütkärüe häm alarnıñ kübese cirle mäğlümat çaralarında kiñ yaqtırtıluı, berläşmä artında nindider säyäsi köçlär tormıy mikän digän soraw da tudıra. “Berläşmäneñ näq cirle saylawlar aldınnan oyışuı, anıñ kemnär öçender start mäydanı buluına işärä itä kebek”, - di tatar şähär milli mädäni möxtäriäte räise Ğafiä Aleeva.
“Omskaya initsiativa” xäräkäte cıyınnarı yaxşı, irken zallarda uzdırılğanda, “Watanım Seber” xäyriä fondınıñ xisap cıyılışı fond citäkçese Gosduma deputatı Oleg Smolinnın qabul itü bülmäsendä genä ütte. Döres, “Küñeleñ kiñ bulsa, bülmä tarlığı sizelmi”, digän äytemdägeçä, deputat bülmäse artıq zur bulmasa da, cıyılışqa kilüçelärneñ barsına da urın tabıldı. Şunsı da üzençälekle, “Watanım Seber” xäyriä fondınıñ xisap cıyılışı yıl sayın yaña yılnı iskeçä qarşı alğan köngä, yäğni 13 ğinwarğa turı kiterep ütkärelä. Häm anda räsmi xisap çığışlarınnan, söyläşülärdän soñ çäy östäle dä äzerlänä. Biredä tağın ber kürkäm ğädät yäşi: fond sostavın kergän milli oyışmalar aktivistları yaña yıl täbrikläwlären üzläreneñ tuğan tellärendä citkerälär. Uzğan utırışta tatar, qazax, latış tellärendä täbrikläwlär buldı. Fond citäkçese deputat Oleg Smolin “Azatlıq” radiosı aşa cir yözendä yäşäwçe tatar xalqına da üzeneñ täbrikläwen yulladı.”Tatar mädäniäte cir yözendä üzeneñ layıqlı urının tapsın. Qayda ğına yäşäsälär dä, tatarlar üzlären öylärendä kebek xis itsennär”,- dide ul.
Saniä Mirxaleeva, Omski
